Нууц мэдээллийн уурхай

Өмнө нь гаальчидтай холбоотой хэрэг голдуу урд хилээс гардаг байсан бол энэ удаад хойд хил дээр болжээ. Энэ удаад Сэлэнгэ аймаг дахь Гаалийн газрын харьяа Алтанбулаг салбарын эрхлэгч /одоогоор ажлаас түдгэлзүүлсэн/ Д.Батбаатар нь албаны эрх мэдэл буюу албан тушаалын байдлаа урвуулан ашигласан хэрэгт холбогджээ. Тэрээр 2015 оноос хойш Монгол Улсын Хилийн боомтын тухай хуулийн 12 дугаар зүйлийн 12.1, 12.2 дахь хэсэгт заасныг зөрчиж өөрийн охины нэр дээр бүртгэлтэй “Гүн мөрөн” ХХК, “Орхон харбин” ХХК болон “Тайгын шанд” ХХК-иудаар гаалийн хяналтын бүсэд бараа импортлон оруулж ирж буй аж ахуйн нэгж байгууллагуудын тээврийн хэрэгсэлд үзлэг шалгалт хийхдээ ачилт буулгалт хийж, түүний төлбөр хэмээн нэг тээврийн хэрэгслээс 20 мянган төгрөг бэлнээр хураан авч улмаар охины компанийн харилцах дансанд тушаалгаж хөрөнгө төвлөрүүлсэн хэмээн буруутгагджээ. Энэ нь нийтдээ 15 сая төгрөг болжээ. Одоо энэ хэрэг шүүх прокурорын хооронд буцсан байдалтай байгаа гэнэ. Нотлох баримтаар  “Орхон харбин”, “Тайгын шанд”, “Гүн мөрөн” компаниудын санхүүгийн баримтуудыг эд мөрийн баримтаар хураан авчээ. Харин Д.Батбаатар нь  гэмт хэрэгт хилсээр гүтгэгдсэн, хууран мэхлэх, айлган сүрдүүлэх замаар авсан хуурамч нотлох баримтаар гөрдөж байна хэмээн эсэргүүцсээр байгаа аж. Тэрээр гаальд удаан жил ажилласан,  “Алтангадас” одон, Хөдөлмөрийн хүндэт медаль, “Хүндэт гаальчин” тэмдэгээр шагнагджээ. Хоёр жилийн өмнө дэгдсэн Оросын хүчний байгууллагийнхан Албанбулаг боомтод Монголын  гаальчдыг байцаасан гэх шуугианд  нэр нь сонсогдож байсан.

NUUTS.mn