Нууц мэдээллийн уурхай

Монголын төр дээрээсээ өтжээ. Өнгөрсөн нэг жилийн хугацаанд УИХ-ын хэд хэдэн гишүүн Төрийн ордонд ёс зүйн ноцтой зөрчил гаргасан. МАН-ы эмэгтэй гишүүд хуралдаан дээр хээв нэг боов идэж бохь зажилсан. УИХ-ын гишүүн Б.Ундармаа чуулганы танхимд, гишүүн Д.Дамба-Очир байнгын хорооны хуралдаанд согтуу орж буй гэх бичлэгүүд ил болсон.

Мөн МАН-аас сонгогдсон  гишүүн А.Амарзаяа сонгогчидтойгоо муудалцаж, АН-ын Б.Наранхүү намрын чуулганаас хойш бүтэн нэг жилийн хугацаанд чуулганы хуралдаандаа нэг ч удаа суугаагүй нь ил боллоо. Хамгийн сүүлд залуу гишүүн Д.Гантулгыг хүчингийн хэрэгт холбон шалгахыг хохирогч, түүний өмгөөлөгч шаардсаар байна.Гэтэл УИХ-ын Ес зүйн дэд хороо өнгөрсөн хугацаанд огт хуралдаагүй, дээрх зөрчлүүдийг хэрхэн шийдвэрлэсэн нь тодорхойгүй байгааг О.Баасанхүү гишүүн онцоллоо. Энэ хороог архаг гишүүн Д.Лүндээжанцан даргалдаг ч эдгээр ёс зүй зөрчсөн хэргүүдийн хажуугаар нүдэн балай чихэн дүлий явж иржээ. Үнэндээ энэ ахмад гишүүнээс ажил горьдоод хэрэггүй биз. Өдгөө тэрээр бүхэл бүтэн хорооны ажлыг унагачихаад Үндсэн хуулийн өөрчлөлтийг яриад явж байна. Улс төрд удсан хүмүүсийг энэ ажлаас хол байлгахгүй бол улам будлиан хутгах аюултай юм.

НУУЦ.мн