Нууц мэдээллийн уурхай

Эрдэнэсийн ангуучид шуугиан тарьсан их олз илрүүлжээ. Далай тэнгисээс нууцлаг эрдэнэсийг хайдаг Английн “Advanced Marine Services” компаний хайгуулчид Исландын эргээс зүүн өмнөд зүгт 190 км-ын зайд нацист Германы алт ачсан живсэн хөлгийн байрлалыг тогтоож илрүүлжээ. Живсэн хөлөг нь “SS Minden” хэмээх хөлөг онгоц болох нь тогтоогдсон байна.

Энэ хөлөг Бразиль дахь Германы “Dresdner Bank”-ны алтны нөөцийг ачин 1939 оны 9-р сарын 6-ны өдөр далайд гарчээ. Хөлөг аялсаар Исландын арлын хажууд ирэхэд нь Английн тэнгисийн цэргийн байлдааны хөлөг онгоцнууд илрүүлжээ. Байлдааны “HMS Calypso” болон “MS Dunedin” гэдэг хоёр хэрэх онгоц хавчин хөөсөөр 9-р сарын 24-нд гүйцэхэд Адольф Хитлерийн тусгай тушаалаар хөлгийн бүрэлдэхүүн онгоцоо живүүлжээ.

Живүүлсэн “SS Minden” –д Өмнөд Америкд ажиллаж байсан Германы банкнуудын алт мөнгө гээд нийтдээ дөрвөн тонн эрдэнэс байсан нь одоогийн ханшаар 150 сая долларт хүрэх гэнэ. Нацист Германы алт ачсан онгоцны шуугиан дэгдэхэд Исландын эргийн хамгаалалтын онгоцууд живсэн хөлгийн байрлалыг хамгаалалтандаа авчээ. Өдгөө хөлгийг олсон Английн компанийхан Исландын Засгийн газартай хэлэлцээр хийж байгаа гэнэ.
 

НУУЦ.мн