Нууц мэдээллийн уурхай

УИХ-ын гишүүн М.Оюунчимэг гал түймэртэй тэмцэхэд сарын цалингаа хандивлахыг цахимаар уриалаад өөртэй нь хэн ч нэгдээгүй тул ОБЕГ-д ганцаараа очиж цалингаа хандивлажээ. Сэтгэл нь сайхан юм. Гэхдээ чуулганы танхимд хоол идэж болохгүй гэдгийг мэддэггүй шигээ иргэд сарынхаа цалингаар л амьдардаг гэдгийг бас мэддэггүй нь ичигвэртэй аж. Хэрвээ гишүүн хатагтайг “дагаад намирах” юм бол олон өрх сардаа хоосон явна. Хөрөнгөтэй гишүүдийг дагаж гэрийнхээ сарын хоолны мөнгийг бариад гүйх нэг ч хүн гарахгүй нь гашуун үнэн. Тэнгэрт байгаа гишүүд газарт байгаа иргэд нь сарын цалингаа сардаа хүргэх гэж ямар их зовж зүдэрдэгийг огт мэддэггүй гэдэг нь М.Оюунчимэгээс харагдлаа. Хандив тусламжинд цалингаасаа өгдөг ч хэзээ ч хэн ч сарын цалингаа бүтнээр нь өгч байгаагүй. Төрийн албан хаагчид яам газраараа нэгдээд нэг өдрийн цалингаа л өгдөг гэдгийг гишүүн хатагтай сонсоогүй аж.  Дээр нь хэрвээ сарын цалингаа өгчихвөл нөгөө айл нь бүтэн сар хоосон хононо гэдгийг бүр ч мэддэггүй аж. Гал түймэртэй тэмцэх нь иргэдийн гэхээсээ төрийн үүрэг.

Үүнийг хариуцсан ОБЕГ гэж бий. Дээр нь гал усны аюултай тэмцэх ажлыг эрхэлдэг Шадар сайд У.Хүрэлсүх гэж мундаг нөхөр суудаг.  Гамшигт зориулж жил бүр олон арван тэрбум төгрөг төсөвлөдөг. Төрийн сайд, төрийн байгууллага ажлаа муу хийсний гайг ард түмний нуруун дээр үүрүүлэх хэрэггүй. Хэрвээ мөнгө өгмөөр байгаа бол мөнгөгүй иргэдийг биш мөнгөтэй гишүүдээ л уриалбал таарна.
 

НУУЦ.мн

НУУЦ.мн