Нууц мэдээллийн уурхай

Улсын хэмжээнд өнөө өглөөний байдлаар 21 түймэр асаж байна. Үүнээс таван түймэр нь хүрч очиход хэцүү байрлалд асаж хүрээ нь улам нэмэгдэж  байна гэх мэдээлэл иржээ. Түймрийг унтраахаар 700 гаруй албан хаагч дайчлагдсан ч хүрэлцэхгүй байна. Энэ олон түймэр уржигдар эсвэл өчигдөр асаагүй. Сэлэнгэ аймгийн Түнхэлд тосгонд ойртон ирсэн түймэр гэхэд л 17 хоногийн өмнө ассан. Гэтэл энэ зуур төр засаг наадамдаж салбар хариуцсан сайд нь эрлийз адууг хасах тухай ярьж явсан.

Наадмын хөөрөлд автаад байхад аймгийн онцгой байдлын ажилтнуудаас өөр түймэр ярих хүн байсангүй. Харин ч наадмын  өмнө онцгойн 25 ажилтан ууланд таван хоног таг мартагдсан хэрэг гарсан. Шадар сайд У.Хүрэлсүх ч баяр наадмын үеэр түймрийн талаар дурсаагүй. Харин наадмын маргаашнаас л хотод утаа орж ирэхэд дээр дооргүй сандралдсан. Хэт хуурайшилттай нөхцөлд дүрэлзсэн түймрийг хүрз барьсан онцгойнхон гараараа унтрааж дийлэхгүй, хүчирхэг техник хэрэгсэ хэрэгтэй. Гэтэл жилийн жилд ой хээрийн түймэр гардаг манай улсад тусгай зориулалтын онгоц алга. Онцгой байдлыг хариуцсан Шадал сайдаар олонтоо томилогдон ажилласан У.Хүрэлсүх онгоц хэрэгтэйг мэдэхийн дээдээр мэдэж байгаа. Өнгөрсөн хаврын түймрээр хэвлэлүүдэд онцгой байдлын газрыг  орчин үеийн техникээр хангах тухай асуудлыг хөндөж байсан. Ой хээрийн гал түймрийг унтраах зориулалттай онгоц нь 5-7 тэрбумын үнэтэй гэнэ. Хаврын түймрээс хойш бараг гурван сар өнгөрсөн ч энэ асуудлыг хэн ч хөөцөлдөлгүй орхижээ. Бодвол ирэх жилийн хавраас нааш түймэр гарахгүй гэж тооцоо биз. Гэтэл хаврын түймрээс аюултай зуны түймэр дэгдлээ. Харин онцгойнхон нь өдгөө гар хоосон гал руу орж байна.
 

NUUTS.mn