Банкны ажилтан АТМ-ын өрөөндөө түгжигдээд хоёр цаг тусламж гуйн орилжээ /итгэмээргүй/
Нийтэлсэн: 2017-07-14 08:06:15
.jpg)
Америкын гудамжны АТМ нь ардаа 2-3 хүн элбэг багтахаар хэмжээтэй өрөөтэй агаад тэнд нь орж цэнэглэж бас засвар тохиргоо хийдэг гэнэ. Тэгвэл банкны засварын ажилтан тэр өрөөнд нь түгжигдээд баларсан хэрэг гарсан тухай Fox News-д мэдээлжээ. Корпус-Кристи хотын Bank of America-гийн засварын ажилтан АТМ-ын тохиргоо хийхээр очжээ. Түүнийг арын өрөөнд нь ороод байтал гэнэтхэн хаагдсан байна. Тэрээр дотроос онгойлгох гэхэд тусгай картаа машиндаа орхисон байжээ. Утсаар ярих гэтэл мөн л машиндаа мартсан байсан тул байдгаараа хашгирч орилж үзжээ. Гэсэн ч дуу чимээ нэвтрүүлдэггүй, цохилт даах чадвартай хана, төмөр хийцний цаанаас дуу нь сонсогдсонгүй тул ийнхүү АТМ-ынхаа “олзлогдогч” болжээ. Гэхдээ тэрээр хүнд байдалд орсон ч нэлээд бүтээлчээр сэтгэж тусламж гуйсан байна.
.jpg)
Азаар тэмдэглэлийн дэвтэр авч явсан тул “Надад туслаарай, би энд түгжигдчихлээ, энэ дугаар луу залгаад өгнө үү” хэмээн бичээд мөнгө авахаар ирсэн хүмүүсд карт шургуулдаг нүхээр өгч эхэлжээ. Гэтэл олон хүмүүс үүнийг нь тоглоом шоглоомоор хүлээн авч инээгээд л орхиж явж гарчээ. Тэд ТВ-ийнхний тавьсан урхи, хошин шогийн нэвтрүүлэгийн бичлэг хийгдэж байна гэж “таасан” гэнэ. Ийнхүү хоёр цагийн дотор ирсэн тавь гаруй хүнээс хэн нь ч итгэсэнгүй. Азаар нэгэн сонор сэрэмжтэй иргэн карт шургуулдаг нүхээр гарч ирсэн цаасыг уншаад цагдаа дууджээ. Дуудлагаар ирсэн цагдаа нар ч АТМ-ын цаана тусгай өрөө байдгийг ойлгохгүй бантагнажээ. Эцэст нь арай гэж учир нь олдож банкнаас ирсэн хамгаалалтын тусгай баг АТМ-ыг онгойлгож азгүй ажилтнаа чөлөөлж авсан байна.
NUUTS.mn
