Нууц мэдээллийн уурхай

Энэ зуны хамгийн том бай шагналтай наадмыг Завханаас төрсөн дөрвөн тод манлай уяач нийлж хийхээр болжээ. Цаад санаа нь аймгийн уяачдын холбооны тэргүүн Ш.Батсамбуугийн УИХ-д нэр дэвшихээсээ өмнө хийж байсан жийпний байтай уралдааныг давах бодолтой аж. Тод манлай уяач Н.Даш-Өлзий, Л.Цандэлэг, Д.Дагвадорж, Б.Содномцог нарын буюу “Дөрвөн тод”-ын гэх наадам нь энэ сарын 21-22-нд болно. Албан ёсны нэр нь Завхан аймгийн тэргүүн хүлгийг шалгаруулах уралдаан гэжээ. Аймгийн тэргүүн хүлгийг шалгаруулах тул зөвхөн Завханы уяачид уралдана. Зургаан насны морь уралдуулж түрүүлсэнийг таван сая төгрөг, айрагдсаныг нь дөрвөн сая төгрөгөөр байлна. Харин бөхийн барилдаан нь нээлттэй болох гэнэ. Мөн энэ зуны наадмын хамгийн өндөр шагналтай нь аж. Түрүү бөхөд 25 саяыг өгөх бол шөвгийн дөрөвд тус бүрд 10 саяыг хаяна гэжээ. Ийнхүү мөнгөөр зодсон нэгэн наадам Завханд болох гэж байна. Анхны том наадмыг нь “Нарантуул”-ын босс Ш.Сайхансамбуу хийснийг нь дүү Ш.Батсамбуу нь үргэжлүүлсэн. Өдгөө дөрвөн тод нь дааж авлаа. Хэн нь ч хийсэн наадмын бийлэгжүү, мөнгөжүү гэдэг төрхийг нь алдахгүй авч явж байгаа аж. Тод манлай уяач Л.Цандэлэг нь газар тариалангийн том босс бол “Таван толгой” ХК-ний Д.Дагвадорж нь Сөүлийн Ганнам дүүрэгт байртай гэдэг. Тод манлай уяач Н.Даш-Өлзий нь тэртээх 1991 онд дархан варагуудыг тус бүрийг нь 25 мянган төгрөгөөр хувиасаа шагнаж байсан хур баян нэгэн. Тэрээр ГХ-ны сайд Ц.Мөнх-Оргилын хадам аав.  Тод манлай уяач Б.Содномцог мөн л бийлэгжүү эр юм.  Дөрвөн тодын наадам гадны уяачдад хаалттай, харин бөхчүүдэд нээлттэй болох тул ногтоо ганзаглаад очих л үлджээ.
 

НУУЦ.мн