УИХ-ын гишүүд 10 тэрбум төгрөг авахаар боллоо
.jpg)
Эдийн засгийн өсөлт өндөр байхад УИХ-ын гишүүд тойрогтоо хөрөнгө оруулалт хийх нэрээр өөрсөддөө нэг тэрбум төгрөг хувиарлуулдаг байсан. Гаргалгаа нь тун энгийн. Тойргоос нь хөрөнгө оруулалт олж өгөх хүсэлт ирдэг, гишүүд ийм хүсэлтэнд дарагддаг тул эхлээд 500 сая төгрөг тавиулж авч байлаа. Дараа нь нэг тэрбум болж өссөн. Сүүлдээ тойргоос ирэх хөрөнгө оруулалтын “санал” 5-6 тэрбумд хүрсэн тул нэгхэн тэрбум юу ч болохгүй байна гэж гомдоллосон. Гишүүдийн тойрогтоо цацсан мөнгөөр гарт баригдаж нүдэнд харагдах зүйл хийгдсэн нь тун цөөн. Ихэнхи нь элсэнд цацсан ус шиг ул мөргүй арилсан. “Азаар” сүүлийн жилүүдэд эдийн засаг доройтсон тул гишүүд мөнгө нэхэж чадаагүй. Гэтэл “гайтай” юм шиг эдийн засагт эерэг үр дүн гарах нь тэр. Долларын ханш суларч, голлох ашигт малтмалын үнэ өсөж хөрөнгө оруулагчдын итгэл эргэн сэргэсэн гэнэ. Үүнийг хамгийн соргогоор анзаарсан хүмүүс нь гишүүд өөрсдөө. Ингээд л шуудхан авдаг юмаа авахаар хэлэлцээд нэгэнт тохирчихжээ. Энэ удаад бүр 10 тэрбумыг тавиулж авах гэнэ. Ардын намыхнаас гарсан энэ саналыг АН-ынхан эсэргүүцсэн болоод өнгөрнө. Тэдэнд ч бас мөнгө хэрэгтэй. Ардын намын гишүүд сонгогдоод жил болж байхад тойрогтоо ЭМ-ийн сайд А.Цогцэцэгийн хувиарлаж өгсөн түргэн тусдамжийн тэргийг л аваачиж өгсөнөөс өөр олигтой “ажил” хийсэнгүй. Ийм янзаараа явбал 20 онд гарах магадлал муутай. Дээр нь Ерөнхийлөгчийн сонгуульд ялагдчихсан байдаг. Байдал хүндэрсэн тул одооноос л хөрөнгө оруулалтаар тойрогоо “бөмбөгдөх” хэрэгтэй болжээ. Гэхдээ дундаас унагах юмаа унагаад авахаа андахгүй. Хамгийн түрүүнд тэд сонгуулийн үед тавьсан өр ширээ дарах биз. Доод тал нь 250-300 саяын сонгуулийн зардлын зээлтэй гишүүд зөндөө л байна. Үүний дараа л тойрогтоо таван цаас шидэх бололтой.
NUUTS.mn
