Нууц мэдээллийн уурхай

Өмнөд Хятадын Шаньси мужид коммунист засаглалын харгис хэрцгий нүүр төрхийг харуулсан үйл явдал болжээ. Ханьчжон хотын Ханьфень дүүргийн Вугийн  байшин хот төлөвлөлтийн газар чөлөөлөх ажиллагаанд өртжээ.

Зам тавих шугамд байшин хашаа нь орсон тул хотын захиргаанаас газраа чөлөөлж өгөхийг удаа шаарджээ. Вугийн гэр бүл таван том хүн болон гурван хүүхдээс бүрддэгагаад хотын удирдлага дөрвөн өрөө байр болон 95 мянган юан/10 мянган доллар/-ы нөхөн төлбөр санал болгожээ. Харин Ву дэлгүүр ажиллуулахад тохиромжтой нэг  давхарт таван өрөө байр мөн 120 мянган юань өгөхийг шаардсан байна. Ийнхүү тохиролцоонд хүрэлгүй уджээ. Эцэст нь үл мэдэгдэх этгээдүүд гэнэт Вугийн гэрт дайран оржээ. Тэд насанд хүрсэн таван хүнийг барьж авч хүлэн амыг нь скочдоод зэрлэгээр зоджээ.

Гурван хүүхдийг нь хувцасны шүүгээнд түгжсэн гэнэ.

Ухаан алдтал нь зодсоны дараа бүгдийг нь гудамжинд гарган хаяжээ. Хүүхдүүдийг нь мөн гаргажээ. Гэмт этгээдүүд зугтан одохын хамт барилгын компаний бульдозер гарч ирэн хашаа байшинг нь нураасан байна. Вугийн хамаатнуудын мэдэгдсэнээр энэ хэрэгт хотын удирдлага хамаатай аж.

Бүхэл бүтэн гэр бүлийг хүлээд зодсон этгээдүүд нь өөр мужийн аялгаар ярилцаж байсан гэнэ. Мөн бульдозер хүлээж байсан мэт гэнэт гарч ирсэн нь сэжиг төрүүлжээ.

Өдгөө хамаатнууд нь хотын удирдлагыг гэмт хэрэгтнүүдийг хөлсөлсөн хэмээн хардаж байгаа бол тэд болсон явдалд ямар ч хамаагүй гэжээ. Вугийн гэр бүлийн эмчилгээний зардлыг хотын захиргаа гаргажээ. Мөн зодуулсан гэр бүлд амлаж байсан дөрвөн өрөө байрыг нөхөн төлбөрийн хамт өгөхөд бэлэн гэдгээ мэдэгдсэн байна. Хүний эрхийг хамгаалагчдийн баталж байгаагаар энэ нь хотын захиргааны тавьсан нөхцлөөр газраа чөлөөлдөггүй иргэдийг айлгах зорилгоор хийсэн ажиллагаа гэнэ.