Нууц мэдээллийн уурхай

Ердөө хориодхон хоногийн өмнө буюу 6-р сарын 14-нд Кени улсын ерөнхийлөгч Ухуру Кеньятта парламентийн сонгуулийн сурталчилгааны ажлаар Буси мужид улсын хамгийн том төслийн нэг болох Сигири голын гүүрний барилгын ажилтай танилцсан. Хэдийгээр гүүрний албан ёсны нээлт биш хэдий ч Ерөнхийлөгчийг очих үеэр эрх баригчид мужийн олон мянган иргэдийг цуглуулсан том цуглаан хийсэн.

Энэ гүүрний ажил нь ирэх 8-р сард болох сонгуулиар Ерөнхийлөгчийн тэргүүлдэг эрх баригч эвслийн  сонгогчдын саналыг авах, Засгийн газрын нүүр тахлах цөөн ажлын нэг болсон. Цуглааны үеэр Ерөнхийлөгч өөрийх нь эвсэл засаг барьсан жилүүдэд улс орны хөгжлийн гол хөдөлгөгч хүч болсон дэд бүтцэд маш их анхаарч их хөрөнгө зарцуулсан тухай дэлгэрэнгүй ярьжээ.

-Энэ гүүр баригдсанаар голын усанд амиа алдагсадын тоо эрс багасаж ард иргэд аюулгүй зорчин зэх зээл сургууль эмнэлэгт саадгүй хүрдэг болно.  Мөн энэ гүүр нь та бүхэнд хэн нь зөвхөн ярьдаг харин хэн нь жинхэнэ бодит ажил хийдэг болохыг харуулсан тод жишээ болох ёстой-
Буси муж нь улсынхаа баруун зүгт оршдог, нэг ёсондоо манай баруун гурван аймагтай ижилхэн газар аж. Дэд бүтэц бараг хөгжөөгүйн дээр жил бүр Сигири голыг гатлах гээд олон арван хүн усанд осолдож амиа алддаг байжээ. Гүүр барих ажлыг Хятадын зам гүүрийн барилгын “Overseas Construction and Engineering Company” 12 сая доллароор барьж гүйцэтгэжээ.  Албан ёсны нээлтийг сонгуулийн өмнөхөн хийхээр төлөвлөжээ. Гэтэл Ерөнхийлөгчийг очсоноос 12 хоногийн дараа буюу 6-р сарын 28-нд гүүр нурж унажээ.

Ийнхүү эрх баригчдын сонгогчдыг татах гол ажил нь бүрэн дампуурсан байна. Кени улсын Ерөнхийлөгч нь манай дарга нартай адил дэд бүтэц төмөр замын ажлаар шоу хийдэг аж. Өнгөрсөн 3-р сард Хятадын Эксимбанкны 3,8 тэрбумын хөрөнгө оруулалтаар санхүүжүүлэгдэх төмөр замын “Madaraka Express” төслийг сүр дуулиантай эхлүүлсэн. Энэ төслөөр Кени нь төмөр замын хөндлөн сүлжээтэй болохоос гадна Зүүн Африкын хөрш орнуудтайгаа төмөр замаар холбогдох гэнэ.

Сигири голын гүүр нурсаныг сөрөг хүчний нэр дэвшигч овжин ашиглаж төслөөс мөнгө идсэн эрх баригч эвслийн том улстөрчдийг нэр заан шүүмжилж эхэлсэн байна.

НУУЦ.мн