Нууц мэдээллийн уурхай

Энэ ноцтой хэрэг өнгөрсөн онд гарсан ч одоо болтол шийдэхгүй удсаар байна. “Дарханы төмөрлөгийн үйлдвэр”-ийн Улаанбаатар хот дахь төлөөлөгчийн газрын хашаанд их хэмжээний төмөр байдаг гэнэ. Үүнээс нь хулгай хийх гэж орсон иргэнийг хамгаалалтын албаныхан барьж авсан ч гавлан хууль бусаар хорьж амийг нь хөнөөсөн гэх хэрэгт буруутгагдсан. Хүний амь хохироосон хэрэгт тус төлөөлөгчийн газрын хамгаалагч О.Б холбогдсон агаад тэрээр ээлжийн ахлагч Ж.Э-гийн тушаал заавраар гавлаж хорьсон гэж мэдүүлсэн. Хохирогч Д.Д нь төлөөлөгчийн газрын хашаанаас төмөр хулгайлах гэж ороод баригдсан. Барьсан хамгаалагч нь эхлээд сагсны шийтний шонгийн төмөртэй хоёр гарыг нь ард нь холбож гавласан. Улмаар гавлуулсан хүн доош суугаад байсан гэх шалтагаар юүдэнтэй цамцны малгайнаас нь нохойны оосроос холбож сагсны шийтний кольцооноос дээш татаж уяжээ. Тэрээр энэ тухайгаа “...босгож зогсоож байгаад нохойн хөтөлгөө уяаг аваад шийдний кольцо руу бариултай хэсгийг нь шидэж оруулаад түгжигч төмөртэй хэсгийг бариулаар нь оруулж гогцоолоод түгжигч төмрөөр тэр хүний өмсөж явсан малгайтай цамцны малгайны бөндгөр оёдлоос нь хавчсан..." гэж мэдүүлсэн. Ингэж уясаны улмаас малгайтай цамцны зах хэсгээс босоо байрлалд байхад нь механик хүч үйлчилж улмаар амиа алдсан нь тогтоогдсон байна. Өөрөөр хэлбэл хохирогч  амьсгалын замын бүтэлтэд орсон аж.  Харин хамгаалалтын албаны ээлжийн ахлагч Ж.Э  нь хамгаалагчдаа  баригдсан иргэний хууль бусаар хорих талаар утсаар үүрэг чиглэл өгч, хүнийг хууль бусаар хорих гэмт хэрэг үйлдэхэд бусдыг өдөөн түлхсэн, зоригжуулсны улмаас бусдад хүнд хор уршиг учруулсан гэмт хэрэгт буруутгагдаад байгаа. Өдгөө хэргийн нөхцөл байдлыг тодруулж тогтооход ээдрээтэй болжээ. Гол нотлох баримтын нэг нь төлөөлөгчийн газрын камерийн бичлэг байсан. Гэтэл тухайн үед 7-р камерийн бичлэг хийсэн "Dijital video rekorder" гэсэн бичигтэй DVR төхөөрөмжөөс бичлэгийг Си Ди дээр буулгаж чадаагүй байна. Үүнийг мэргэжлийн хүмүүс хүртэл хийж чадаагүй гэнэ. Харин хохиргчийн ар гэрийнхэн хамгаалалтын албаныхан зориуд төхөөрөмжийг гэмтээсэн хэмээн хардаж байгаа аж.

НУУЦ.мн