Нууц мэдээллийн уурхай

Нохойнд төсвийн мөнгийг зарцуулдаг нь ганц Монголын Батзоригтонгууд биш гэнэ. Австралид ч тийм нөхдүүд байдаг аж. Гэвел гэдэг энэ герман овчарк уг нь Квинсленд мужийн цагдаагийн газрын нохойн албаны сургуулийн гөлөг байжээ. Тэрээр нэг “төгсөлтийн” 40 гөлөг дундаасаа хамгийн шилдэг нь байсан гэнэ. Гэтэл төгсөлтийн шалгалтын үеэр албаны нохойд байж боломгүй нэг шинж нь илэрч халагджээ.

Тэрээр хэтэрхий найрсаг зөөлөн зантайн дээр хүн болгоны өмнө шарвагнаад байсан аж. Гэвелийн аз болоход энэ үеэр мужийн амбан захирагчийн ёслолын албаныхан нохойн сургууль дээр иржээ. Тэд мужийн ёслол хүндэтгэлийн ажиллагаанд оролцох төрийн ёслолын нохойг сонгож авахаар ирсэн аж.

Мужийн төрийн ёслолын нохой нь бие гальбир өнгө зүс сайтайгаас гадна зөөлөн зантай байх ёстой гэнэ. Тэгвэл Гэвельд тэр бүх чанар цогцолсон байжээ. Ингээд түүнийг сонгосон байна.

Ийнхүү өдгөө бүх хангамжаа төрөөс гаргуулсан төрийн нохой болжээ. Мужийн захиргааны ордонд байрлаж хоол эмчилгээ арчилгааны зардлыг нь татвар төлөгчид төлдөг. Тусгай үйлчилгээний ажилтан энэ ажлыг хариуцдаг.

Гэвелийн гол үүрэг нь мужийн хэмжээний баяр ёслолын бүх арга хэмжээнд оролцох, хүндэт зочдыг мужийн амбан захирагч болон гэргийх нь хамт хүлээн авах үдэх аж. Үүгээрээ тэрээр мужийнхаа нүүр төрх болох ёстой.

Түүнээс гадна Гэвел нь Их Британы Эрхэмсэг хатан хааны төрийн албаны түшмэлийн зэрэг хүртжээ.

НУУЦ.мн