Нууц мэдээллийн уурхай

Энэ аймгийн ИТХ нь 33 суудалтайгаас МАН 17, АН 16 суудал авсан гэдэг. Үүнийг нь АН бүтэн жил эсэргүүцэж байна. Гол маргаан Дарьганга сумын 3-р тойрогт гарсан. Энд МАН-ын Д.Болдбаатар ялсан гэдэг ч түүнийг Сонгуулийн хууль тогтоомж зөрчсөн зөрчил гаргасан хэмээн ахин сонгууль явуулсан. Ахин сонгууль явуулахад АН-ын П.Мөнхжаргал нь одоогийн Засаг дарга З.Энхтөрийг илүүрхэн  ялж олонхийн санал авч сонгогдсон. Гэсэн ч түүний бүрэн эрхийг аймгийн ИТХ одоо болтол хүлээн зөвшөөрөхгүй байна. Хэрвээ хүлээн зөвшөөрвөл засгаа алдах нь тодорхой тул аргагүй биз. Бас урьдын “тооцоо” ч бий гэнэ. Өмнөх сонгуульт хугацаанд АН давамгайлсан ИТХ нь Ардын намын Ч.Төмөрчулууны бүрэн эрхийг зөвшөөрөхгүй, шүүх цагдаад өгч бүтэн хоёр жил явуулан үйл тамыг нь үзэж байж арай гэж төлөөлөгч болгож байсан.  Өнгөрсөн оны орон нутгийн сонгуулиас хойш ИТХ-ын маргааны талаар нийтдээ 57 удаа шүүх хурал болж аймгийн шүүгчдийг залхаах шиг болж байна. Хоёр нам бие биенээ шүүхэд өгөхөөс гадна гудамж талбайд өлгөсөн шаардлага уриа лоозонг нь урах тасдах зэргээр тэмцэлдсэн. Мөн цахим орчинд ширүүн “дайн” дэгдээсэн.  ИТХ-ын тэмцлийн талаарх мэдээнд лайк дарсан хүн цагдаад дуудагдсан тохиолдол хэдэнтээ гарсан гэнэ. Нам бүр дотроо харьцдаг хаалттай фэйсбүүк грүпптэй аж. Энэ грүппээрээ дамжуулан мэдээллийг маш хурдан шуурхай солилцож байна. Гэтэл АН-ын грүппдээ харилцсан мэдээллүүд гэнэт задарч бөөн шуугиан дэгджээ. Тэр мэдээлэл дунд нь өдгөө бүрэн эрх нь хүлээн зөвшөөрөгдөөгүй байгаа АН-ын П.Мөнхжаргал нь аймгийнхаа нэгэн сэтгүүлчийг “коммунистуудыг өмөөрдөг, ЯСАН ХЭДРЭГ ” хэмээн бичсэн байсан нь илэрчээ.  Ясан хэдрэг гэж хөгширсөн тураалтай малыг хэлдэг. Ажил мэргэжил болон гадаад үзэмжээр нь гутаан доромжилсон явдалд дургүйцсэн сэтгүүлч шүүхэд хандаж 5 сая төгрөг нэхсэн байна. Харин АН-ын гишүүн буруугаа хүлээн зөвшөөрч нэг сая төгрөг төлөхөөр болсон гэнэ.
 

НУУЦ.мн