Нууц мэдээллийн уурхай

Шинэ сонгуулиар гарч ирсэн шинэ дарга нар яагаад ийм ашигч байдгийг яагаад ч ойлгохгүй нь... Сангийн сайдтан тэрбумаар тооцогдох хөрөнгөтэй хүн. Гэтэл хувийн машиндаа албаны шатахуун хийлгэсэн. “Эрдэнэт”-ийн захирал бас л чинээлэг хүн. Гэхдээ олон арван саяар тоологдох хөрөнгө хогшил өөртөө авахуулсан. Бодоод бодоод МАН-ыхны араншин юм гэсэн дүгнэлтэнд арга буюу хүрч байна. Тэрбумтан сайд саятан захиралтай барьцах мэт Гаалийн ерөнхий газрын удирдлагууд ч хирэндээ тансаглаад авчээ. АН-ын үед байсан  Гааль, Татварын ерөнхий газар Ардын намын үед татан буугдаж хоёр байгууллага хуучнаараа бие даан Гаалийн ерөнхий газар, Татварын ерөнхий газар шинэчлэн байгуулагдсан. ГЕГ нь шинэчилсэн зохион байгуулалтаар 190 хүний орон тоотой байгуулагдаж даргаар нь Б.Асралт гэдэг шижигнэсэн залуу ирсэн.

Гэхдээ буруу зүйлээрээ “шижигнэдэг” нөхөр байсан нь саяхнаас илэрчээ. Тэрээр ирсэн даруйдаа халаа сэлгээгээ ГЕГ шинэчлэгдэн байгуулагдсан гэх үндэслэлээр хийж бужигнуулсан. Шинэчилсэн бүтцээр тухайн ажилтны орон тоо нь байсаар атал халагдсан хүмүүс олон бий.  Гаалийн дарга нар албаны гараашинд хувийн машинаа өвөлжин тавьсан гэнэ. Эхлээд том дарга нь тавьж дараа нь бусад нь барьцан тавьсаар энэ өвлийг хувийн машинууд нь “өнтэй сайхан” давсан байна. Дарга нар ч тэр хэмжээгээр дулаан гараашны мөнгөө хэмнээд авчээ. Мөн энд дарга нар болох 3-4-хөн хүн л тоглодог биллиардын өрөө байдаг. Хэдхэн дарга л орж “үйлчлүүлдэг” тансаг бялдаржуулах танхим ч бий. Гэтэл дээрхи тансаглалд аж ахуйн газар нь тог дулаан, цэвэрлэгээнээс эхлээд их мөнгө зардаг одоо ч зарцуулсаар байна. Уг нь Б.Асралт нь УИХ-ын том гишүүн Сү.Батболдын туслах байсан баргийн юмыг тоохооргүй залуу сан...
 

NUUTS.mn