Б.Бат-Эрдэнэ сайд Зүүнбаянгийн цэргийн ангид гарсан ноцтой хэргийг мэдээгүй байжээ
Нийтэлсэн: 2017-04-20 01:54:20
Батлан хамгаалахын салбартай холбоотой асуудлууд ар араасаа хөвөрч байна. Энэ сарын 11-ний өдөр Тавантолгой бэлтгэлийн баазад ноцтой осол гарч хоёр цэргийн албан хаагч амиа алдсаж, найман албан хаагч шархадсан билээ. Тэгвэл үүний дараахантай өнгөрсөн онд гарсан нэгэн ноцтой хэрэг ил болсон юм. Тодруулбал Дорноговь аймгийн Зүүн Баянгийн 336-р ангид цэргийн алба хаахаар явсан Ж.Баярцогт ээлжийн ахлагчдаа зодуулж, өвлийн шөнө гадаа нүцгэн зогссоны улмаас хөл нь хөлдөж, хуруугаа тайруулж эрэмдэг зэрэмдэг болсон хэрэг 2016 оны нэгдүгээр сарын 17-нд гарчээ. Ахлагчдаа зүй бусаар шийтгүүлж, эмнэлгийн зохих тусламж авч чадалгүй цаг алдсаны улмаас хөгжлийн бэрхшээлтэй болсон байхад үйлдвэрийн осол гэсэн акт тогтоон цэргийн албанаас нь чөлөөлжээ. Энэ талаар хохирогчийн ар гэрийнхэн хэвлэлийнхэнд нулимс дуслуулан ярьсанаар олон нийт хэргийн талаар анх мэдсэн билээ. Тэгвэл энэ хэргийг олон нийт мэдэхтэй зэрэг салбарын сайд бас мэдсэн байна. Өөрөөр хэлбэл өөрийнх нь хариуцсан салбарт нь ийм ноцтой хэрэг гараад жил гаруйн хугацаа өнгөрсөн байхад Б.Бат-Эрдэнэ хэргийн талаар огт мэдээгүй явж байсан гэсэн үг. Тэрбээр энэ талаар хэлэхдээ “Энэ ноцтой асуудлыг нуун дарагдуулсан байсан. Харин иргэний гомдол мэдээллийн дагуу ийм зүйл болсон гэдгийг олж мэдлээ” хэмээн ярьжээ.
Шил шилээ даран гарсан дээрх хэргүүдтэй холбоотойгоор Батлан хамгаалахын сайд Б.Бат-Эрдэнэийг огцрох ёстой хэмээн УИХ дахь Ардчилсан намын бүлэг үзэж, мэдээлэл хийсэн билээ. Мөн олон нийтийн зүгээс ч Батлан хамгаалахын сайдыг огцрох ёстой хэмээн санал, сэтгэгдлээ илэрхийлж байна.
olloo.mn
