Нууц мэдээллийн уурхай

People.cn-д мэдээлснээр Хятадын Шаньси мужийн нэгэн үзмэрч 72 настай өвгөнийг “зөн билэг”-тээ итгүүлэн амьдад нь булшинд хийх шахсан байна. Сян Чаоцзе хэмээх өвгөн сүүлийн таван жил ходоодны хорт хавдраар зовж тарчилжээ. Энэ хугацаанд нутгийн нэгэн үзмэрчид эмч нараас илүүтэй итгэн өөрийгөө даатгаж явсан гэнэ. Бүтэн таван жилийн эмчилгээний дараагаар байнга ирдэг өвгөнөөс залхсан үзмэрч 2-р сарын сүүлээр нэг удаа "үзэхдээ" ирэх сарын 23-нд  буюу 2017 оны 3-р сарын 23-нд үхнэ хэмээн айлджээ. Итгэж биширдэг үзмэрч нь айлдсан тул өвгөн бодож санах зүйлгүйгээр үхэлдээ бэлдэж эхэлсэн байна. Тэрээр тосгоныхоо хажуугийн ууланд нүх малтаад агуй хэлбэртэй булш бэлджээ.

Мөн үр хүүхэд ач зээ нартаа үзмэрчийн хэлсэнийг дамжуулж үлдсэн жаахан хөрөнгө газраа нэр заан хувааж өгсөн гэрээслэл бичжээ. Тэрээр хоёр хүү нэг охинтой агаад хүүхдүүд нь тоглоом тохуу болгож харин ч эмчилгээгээ тасаллаа хэмээн зэмлэсэн байна. Гэсэн ч охин нь үхэх өдөр буюу 3-р сарын 23-нд аавындаа зориуд ирж шалгаж үзэхээр шийджээ. Гэрт нь иртэл хэн ч байсангүй. Охин нь тэр дороо тосгоныхон болон цагдаад мэдэгдэж аавыгаа эрж хайсаар өнөөх агуйн булшийг нь олжээ. Цагдаагийнхан амыг тагласан чулууг зайлуулж дотогшоо орох гэхэд явж байгаа хүнд тээг боллоо хэмээн тосгоны хөгшчүүд эсэргүүцэж саад хийсэн байна. Гэсэн ч охины шаардлагаар тосгоны захиргааны ажилтан амыг нь нээхэд Сян өвгөн амь голтой байжээ.

Түүнийг яаралтай эмнэлэгт хүргэсэн байна. Үзмэрчийн айлдсан үхэх өдрийн өмнөх орой нь тэрээр агуйн булшиндаа ирж дотор талаас нь чулуугаар бөглөөд үхлээ хүлээн хэвтжээ. Гэсэн ч даарч хөрж бас агааргүйдсэн тул ухаан алдан унажээ. Азаар тусламж цагаа олж ирсэн агаад үүнээс хойш үхнэ гэж зүтгэлгүйгээр эмчилгээгээ үргэжлүүлнэ гэж амлажээ. Мөн үзмэрчийнхээ эсрэг гомдол гаргахаас татгалзсан гэнэ.
 

NUUTS.mn