Хэзээ ч хэрэглэж үзээгүй гоо сайхны бараагаа худалдаж авахын тулд 2 сая юань хулгайлжээ
Нийтэлсэн: 2017-04-06 08:40:09
Qianjiang Evening News-д мэдээлснээр өмнөд Хятадын Вэнжоу мужийн 26 настай, өрх толгойлсон эмэгтэй хэзээ ч хэрэглэж үзээгүй гоо сайхны бараа, үнэт эдлэлээ худалдан авахын тулд компаниасаа хоёр сая юань хулгайлаад баригджээ. Баригдах үедээ 1,2 саяыг нь үрчихсэн байсан гэнэ. Тэрээр компанидаа бэлэн мөнгөний няраваар ажилд оржээ. Авдаг цалин болон ар гэрийн байдал нь тансаглах боломж олгосонгүй. Харин бүсгүй баячуудын хэрэглэдэг үнэт гоо сайхны бараа, бренд хувцас,цүнх зэргийг ихэд шохоорхдог байжээ. Мөн цахимаар өөрийгөө тансаг хэрэглээтэй эмэгтэй болгож цацмаар санагдсан хэмээн мэдүүлсэн гэнэ. Ийнхүү албан тушаалаа ашиглан компаниасаа хоёр сая юань хулгайлаад жинхэнэ тансаглаж гарчээ. Өмнө нь огт хэрэглэж үзээгүй гоо сайхны бараагаа бүгдийг нь худалдан авчээ. Зөвхөн уруулын будгийг гэхэд мянган ширхэгийг нь авсан байжээ. Дээр нь сүрчиг, бренд хувцас, цүнх гээд маш их барааг олон тоотойгоор худалдаж авчээ. Тэрээр өдөрт 15-20 удаа интернэт худалдаа хийж захиалга өгч байсан нь тогтоогджээ. Нэг бараанаас доод тал нь 20-50 ширхэгийгхудалдан авсан тул цагдаа нар нэгжлэгээр хэрэглээгүй ашиглаагүй гоо сайхны бараа, хувцас цүнх олноор нь хурааж авсан гэнэ. Харин амьдрал дорой ар гэрийнхэн нь үрсэн мөнгийг нь төлж чадахгүй гэжээ.
NUUTS.mn
