Х.Бадамсүрэнгийн нэхсэн "тусгай хангамжийг" Ц.Ням-Осор нэгбүрчилэн дэлгэжээ
Энэ өдрүүдийн хамгийн хурц бас олон нийтийн анхаарал татсан сэдэв нь “Эрдэнэт” үйлдвэрийн ерөнхий захирлын 10 мянган доллар буюу 24,5 саяын цалингийн шуугиан хэвээрээ байна. Ядарч зүдэрч нүүрсний мөнгөө дийлэхгүй болсон гэр хорооллынхон, байрны төлбөртөө дарлагдаж суугаа лизингийхэнд яагаад ч сайхан сонсогдох мэдээ биш. Иргэдийн уур цухал хүрэх нь мэдээж. Гэтэл үүнийг нь ТӨБЗГ-ын дарга Ц.Ням-Осор гэдэг нөхөр бүр дэврээж орхисон төдийгүй цаад хүнийхээ нүүрийг нэгмөсөн түллээ.
“Эрдэнэт”-ийн ерөнхий захирал сарын 10 мянган долларын цалингаас гадна эмчилгээний зардал, жилд нэг удаа гэр бүлийн гишүүний хамт гадаадад амрах аялах зардал, Улаанбаатард 4-5 өрөө байрыг үйлдвэрийн хөрөнгөөр авахуулах мөн нэг хүүхдийг нь бүр гадаадад сургах зардлыг даалгах зэрэг тусгай хангамж шаардсан 14 санал оруулж ирсэнийг дарга зарлах нь тэр. Үүнийг сонссон хүмүүс арай ч дээ хэмээн шуугиж байна. Х.Бадамсүрэнг байргүй гэхэд хэн итгэх билээ, эмнэлэгийн үзлэг шинжилгээний мөнгө өөрөө төлөх чадавргүй гэхэд хэн үнэмших билээ... Ийнхүү их зүйл шаардсан захирлыг тогтоон барьсан мундаг дарга болж харагдах гээд өнөөх хүнээ нэгмөсөн шарж хаясаныг санаатай хийсэн үйлдэл гэж тааж болох юм. “Эрдэнэт”-ийн ерөнхий захиралын нэр хүнд унаж байсан бол Ц.Ням-Осорын мэдэгдлийн дараа улам уруудлаа.
NUUTS.mn
