Нууц мэдээллийн уурхай

Алдарт жүжигчин, өдгөө 70 гарсан Сильвестр Сталлоне хайртай нохой Баткусынхээ түүхийг цахимаар хуваалцсан нь олон хүний сэтгэлийг хөдөлгөжээ. Олон жилийн өмнө хэний ч танил бус, нэр алдаргүй бас мөнгөгүй байхдаа мастиф үүлдрийн Баткус гэдэг нохойтой байжээ. Түүний өгүүлснээр хэдийгээр тулааны нохой гэгддэг ч тулааны нохойн зангүй, зөөлөн эелдэг бас хязгааргүй үнэнч дөрвөн хөлт анд нь байсан гэнэ.

-26 насандаа би маш ядуу байлаа. Тартагдаа тулах ч үе олонтоо тохиолдсон. Тэр үед би уртаашаа хоёрхон өмдтэй, ханзархай ганцхан гуталтай, хүсэл  мөрөөдөл маань нарнаас ч цаана байгаа мэт бодогддог байсан. Гэхдээ надад  Баткус сайн анд байсан. Миний хошигнолд хөөрдөг, миний зан аяыг шууд дагадаг, намайг байгаагаар минь хайрладаг тийм л нөхөр байсан. Та одоо нусны алчуураа бэлдээрэй. Цаашаа бүр сонирхолтой болно-

-Бид хоёр хоюулаа өлөн, туранхай, галт тэрэгний буудал, метрогоор хоног төөрүүлж явдаг байв-

-Сүүлдээ байдал бүр хүндэрч андаа хооллож ч чадахгүй болсон үед арга буюу түүнийгээ 7-Eleven гэдэг дэлгүүрийн дэргэд 40 доллароор зарж нүгэл хийсэн, найзаасаа урвасан-

-Гэтэл удалгүй нэг сайхан өдөр би Рокки кино зохиолоо зарж хайрт найзыгаа буцааж худалдан авах мөнгөтэй болох нь тэр-

-Гэсэн ч нохойг минь худалдаж авсан өөдгүй амьтан намайг мөнгөтэй болсоныг шиншлээд мэдчихэж... Баткусыг маань 15 мянган доллароор зарна гэдэг юм байна. Гэхдээ тэр ийм үнэ хүрэх нохой мөн байсан даа-

Тэд 1981 онд хүртэл хамт байжээ. Үхэхээсээ өмнө Баткус эзнийхээ тоглосон хоёр ч кинонд дүрээ мөнхжүүлсэн.

НУУЦ.мн