Нууц мэдээллийн уурхай

“Шинэ үе” продакшны жүжигчид ӨМӨЗО-ны Шилийн гол аймагт аялан тоглолтоор явах үеэр осол гарч, ослын улмаас жүжигчин Т.Билгүүн нас барсан харамсалтай мэдээ олон нийтийг цочроогоод байсан. Өсөх ирээдүйтэй, чадварлаг залуу хэмээн хошин урлагийн акулууд түүнд ам сайтай байсан ч хэлж ирэхгүй гай түүнийг дайрсан нь мянга, мянган үзэгчдийн зүрхэнд шар ус хуруулж, түүнийг тойрон хүрээлсэн хайртай бүхэн нь нүд дүүрэн нулимстай үлдсэн, одоо ч хатаагүй байгаа. Харин өчигдөр “Шинэ үе” продакшны ахлагч Н.Ариунболд буюу Бооёог "Одон" телевизээс мөнгө нэхэмжлээд авсан төдийгүй ар гэрт нь нэг ч төгрөг өгөөгүй гэх мэдээлэл тархсан. Энэ талаар жүжигчин Н.Ариунболд мэдэгдэл хийжээ. “Талийгаач Т.Билгүүнд “Одон” телевизээс өгсөн хохирлын хоёр тэрбум төгрөгийг намайг авсан гэж зарим сайтад бичсэн байна. Ийм зүйл болоогүй.  Дүүгийнхээ амь насыг мөнгөөр худалдах хүн би биш. Юм гэдэг үнэнээрээ сайхан байдаг учраас хүнийг хилсээр гүжирдэж, лайк цуглуулах гэж оролдож байгаа сайтуудад хатуу арга хэмжээ авна. Би шүүхдэнэ.  Бидний хамгийн эмзэг сэдвээр ингэж оролдож байгаад маш их харамсаж байна” хэмээсэн байна.

NUUTS.mn