Нууц мэдээллийн уурхай

Монголын Үндэсний Олимпийн хорооны Ерөнхийлөгч гэж дархалчихсан юм шиг нэг хүн байдаг.  Тэрбээр өдгөө 15 дахь  жилдээ энэ албыг хашиж, хаан аятай тухалж байгаа хүн.  Өнөөдөр ч энэ албаа хашсаар байгаа.   Тэр ч битгий хэл өнгөрсөн оны эхэнд Монгол Улсын шүүхээс хийсэн хэргийнх нь төлөө түүний албан тушаал эрхлэх эрхийг нь хоёр жилээр хасаж, эрэгтэйчүүдийн жирийн дэглэмтэй хорих ангид 3 жил хорих ял оноосон. Тийм байтал хоригдох нь битгий хэл Өршөөлийн хуульд хамрагдаж, одоо болтол албан тушаалаа эрхэлсээр байна. Тиймээс өнөөдөр Монголд үйл ажиллагаа явуулж байгаа спортын холбоодын удирдлагуудын төлөөлөл сэтгүүлчдэд хандаж, мэдээлэл хийж, МУ-ын ерөнхийлөгч Ц.Элбэгдоржид  захидал хүргүүлж буйгаа дуулгасан юм. Хэвлэлийн хуралд МУ-ын гавьяат тамирчин, мэргэжлийн сумогийн 68 дахь их аварга МЧБХ-ны ерөнхийлөгч Д.Дагвадорж, Монголын Олимпийн медальтнуудын холбооны ЕНБД Н.Баярсайхан, Монголын Гандболын холбооны Ерөнхийлөгч Д.Жаргалсайхан, Монголын даамын холбооны Ерөнхийлөгч Д.Бат-Эрдэнэ нар оролцлоо. Тэд Монголын үндэсний олимпийн хорооны тэргүүн Д.Загдсүрэнг эсэргүүцэн, түүнийг олимпийн  хороог тэргүүлэх эрхгүй хүн гэлээ. Тодруулбал Д.Загдсүрэн нь хууль бус үйлдэл  хийж шүүхээс ял сонссон хүн тул энэ нь спортын шударга ил тод байдлыг зөрчсөн хэрэг болсон гэв. Түүнчлэн өнгөрсөн оны 12 дугаар сард болсон олимпийн хорооны  хурлаар түүнийг дахин энэ хорооны даргаар сонгосон явдал нь шударга бус үйлдэл болсон гэдгийг хэллээ. Хэрэв Д.Загдсүрэн нь цаашид олимпийн хороог удирдсаар байвал энэ нь Олон улсын олимпийн хорооны чихэнд хүрэх л юм бол манай тамирчид олимпийн наадамд оролцохдоо өөрийн улсын далбаагаа мандуулж чадахгүй байдалд орно гэдгийг  мөн хэлсэн. Тодруулбал Энэтхэг улс 2012 оны Лондонгийн олимпоор ийм нөхцөл байдалд орж байжээ. Олимпийн өмнөхөн тус улсын олимпийн хорооны удирдлагууд хээл хахуулийн хэрэгт  холбогдсон тул Олон улсын олимпийн хорооноос тэдний эрхийг хасаж, Энэтхэгийн тамирчдыг Олон улсын  олимпийн хорооны туган дор жагсаан оруулж байжээ. Гэхдээ Энэтхэгийн олимпийн хорооны удирдлагуудын хувьд  хээл хахуулийн хэрэгт нэр нь холбогдсон төдий байжээ. Удалгүй энэ асуудлаа шийдвэрлэж эрхээ сэргээлгэж авч байжээ. Харин манай өнөөдрийн олимпийн хорооны нөхцөл байдал үүнээс хэд дахин дор байгааг тэд хэлсэн. Олимпийн хорооны ерөнхийлөгч Д.Загдсүрэн шүүхээс ял авчихаад  Олон улсын олимпийн хороо руу үргэлж  өөрийгөө гүтгэгдсэн иймээс  өөрийнхөө хэргийг цагаатгагдсан хэмээн худал мэдээлэл явуулдаг аж. Гэтэл түүнийг шүүхээс ял авсан гэдгийг мэдэх л юм бол Монголын тамирчид улсынхаа далбааг мандуулах бус Олон улсын олимпийн хорооны туган дор жагсан олимпийн наадамд оролцох юм. Тиймээс энэ асуудалд Ерөнхийлөгчийг анхаарал хандуулаач хэмээн хүслээ.
 

Б.Сансартуяа
olloo.mn