Нууц мэдээллийн уурхай

Экс ГХ-ийн сайд, өдгөө ерөнхийлөгчийн гадаад бодлогийн зөвлөхөөр ажиллаж байгаа Л.Пүрэвсүрэн нь сайдын суудлаасаа буухын өмнөхөн “Би Монгол улсын төлөө хийдгээ хийсэн” хэмээн сонины нүүр дүүрэн ярилцлага өгч байсныг санаж байна. Ганцхан жил илүү сайд хийхдээ энэ богино хугацаанд их”ажил” амжуулж 28 улсад айлчилан ГХ-ийн сайд нар дундаа нэг төрлийн дээд амжилт тогтоож байсан тэрээр ийм их ажил амжуулсан гэхээр улсынхаа төлөө хийдгээ хийсэн байх магадлалтай. Түүний хажуугаар хамаатнуудынхаа төлөө ч хийдгээ хийсэн гэнэ. Экс сайдтан нийт арваад хамаатнаа гадаадад жолоочоор томилуулсан тухай ДБҮААГ-ын гадаад томилолтын ээлжээ хүлээсэн жолооч нар шуугидаг. Сайдын хамаатнууд Кувейт гэх зэрэг өндөр хөгжилтэй, түүнийг нь дагаад цалин өндөртэй ЭСЯ-уудад “хувиарлагдан” томилогдсон. Сайдын хамаатны “шахаанд” шахагдан Кувейтээс дуудагдсан настай жолооч нь одоо ч гомдолтой явдаг. Тэрээр дарааллын дагуу л гадаад томилолт авч ажлаа хэвийн хийж байсан ч тодорхойгүй шалтгаанаар эргүүлэн дуудаж хэсэг зуур ажилгүй байлгаж байгаад Хойд Солонгосд томилжээ. Энэ улс дахь элчингийн ажилтнуудын цалин Кувейттэй харьцуулахын аргагүй тул ахмад жолооч энэ мэт олон талаараа хохирсон. Буцаан дуудагдахад хүртэл гэр бүлээрээ нүүж ирэн ихээхэн явдал чирэгдэл гарсан. Харин түүний оронд очсон жолооч нь экс сайдын төрсөн ахын хүү Д.А гэгч гэнэ. Говь-Алтайнх гэдгийг нь батлах мэт Алтай гэсэн үг орсон нэртэй. Сайдын ахын дүү ДБҮААГ-д ажилд ороод удаагүй атлаа гадаад томилолт авсан талаар жолооч нар нь арай ч дээ гэмээр зүйл шуугидаг. Гадаад томилолтоо хүлээн 10-15 жил ажиллаж байгаа жолооч нар байсаар байтал дарга даамлуудын хамаатнууд нь ийнхүү дараалал дайраад явчихдаг аж. Жолооч нарын ярьдагаар сайдын ахын хүү нь ДБҮААГ-д ажиллаж байхдаа зам тээврийн зөрчил гарган ажлаасаа халагдсан гэнэ. Гэтэл ажлаасаа халагдсан байхад нь Кувейтэд томилуулах шийдвэр гарч байжээ. Нөгөөх зам тээврийн зөрчлийн хэрэг нь цаагуураа “ногоон гэрлээр” шийдэгдсэн бололтой. Сайдын ахын хүү залуу насны эрхээр хөгжилдөх дуртай гэх...Тийм ч учраас хатуу хууль журамтай Кувейтыг зориуд “сонгон” гадаад томилолт өвөртлүүлснээр тэнд мөрөөрөө ажлаа хийж байсан ахмад жолооч хохирсон байна. Ийнхүү Л.Пүрэвсүрэнг ГХ-ийн сайд, О.Заяамандахыг ДБҮААГ-ын даргаар ажиллаж байхад энэ мэт шудрага бус томилгоо цөөнгүй гарсан гэдэг. Гадаад яамныхан “болдоггүй Болд, болидоггүй Болор, балардаггүй Баттөр” гэж шоглоцгоодог. Угийн шооч тул удахгүй Л.Пүрэвсүрэнд  нэг “нэр” хайрлах биз...Үүнээс гадна саяхан Казакстанд суугаа ЭСЯ-ны жолооч осол хийсэн тухай хэл ам гарсан. Энэ томилгоонд А.Баттөр холбоотой гэж ярьдаг. ДБҮААГ-д дисперчерээр ажиллаж байсан хүнд Ди95 цогцолбороос байр өгөөд дээр нь гадаадад томилсон нь ийнхүү ивээдэг дарга нарынхаа “итгэлийг” даасангүй. Экс сайдын үед явагдсан “Дипломат 95” цогцолборын хувьчлал одоо ч маш их хэл ам дагуулсаар байна. Энэхүү хувьчлалтай холбоотойгоор хувьчлал хийсэн албан тушаалтнуудыг нь АТГ-д өгсөн ч асуудал болоогүй. Өдгөө хамаатнуудаа гадаадад томилуулсан талаар ч өргөдөл гаргаад шийдэгдэх магадлал маш бага. Учир нь нэгдүгээр хүний ойрын хүрээллийн хүмүүстэй холбоотой өргөдөл гомдол тэгсхийгээд л нам дарагддаг гэдэг. Харин шинэ сайд Ц.Мөнх-Оргил гадаад томилгоонд дараалал хатуу баримтлана гэсэн байр суурьтай байгаад жолооч нар баяртай байгаа гэнэ.

 

 

НУУЦ.мн