Нууц мэдээллийн уурхай

 

Засгийн газрын хэрэгжүүлэгч агентлаг Биеийн тамир, спортын газрын даргаар саяхан томилогдсон, "өндөр" хэмээх хочтой Ц.Шаравжамц нэгдүгээр сарын 16-нд өрөөндөө 67 настай гавьяат тамирчныг дуудан, хэл амаар доромжилж, зодож танхайрчээ. МАН-ын идэвхтэй гишүүн байсан учраас түүнийг сонгуулийн дараа БСШУЯ-ны газрын даргаар томилсон байдаг.

Хохирогчийн хувьд түүний гаргасан шийдвэрүүд буруу, тамирчдын эрх ашгийг зөрчсөн шийдвэр гаргаж байна хэмээн 8-9 удаа албан бичиг хүргүүлж байсан боловч хариу өгөөгүй аж. Энэ асуудлаар хохирогч яаманд хандсан учир яамнаас дуудан Биеийн тамир спортын газрын даргатай очиж уулзах санал тавьснаар очсон байна. Биеийн тамир спортын төв ордны 308 тоот албан өрөөнд тэрбээр нэгэн спортын холбооны даргыг хүлээн авч уулзах үеэрээ хохирогчтой ам мурийж, нүүрийг нь хөхөрч хавдтал цохиж зодон, газар унаган өшиглөж, биед нь гэмтэл учруулсан байна. Ц.Шаравжамц хохирогчийг “Яасан их юм ярьдаг хүн бэ. Би гаргасан шийдвэрээ цуцалдаг хүн биш” хэмээн уурлаж хараан зоджээ. Гавьяат тамирчныг зодуулж байхад тус газрын даргын туслах болон өөр нэг ажилтан хажууд нь байснаар салгаж авсан аж.   Тухайн өдрөө хохирогч Сүхбаатар дүүргийн цагдаагийн хэлтэст очин мэдүүлэг өгч, шүүх эмнэлэгт хандан магадлал тогтоолгожээ. Шүүх эмнэлгээс түүнийг хөнгөн гэмтэл гэсэн дүгнэлт гарсан бөгөөд тархи нь доргиж, нүүр нь хавдан, шалбархай үүссэн болохыг тогтоосон байна. Гомдлын дагуу Ц.Шаравжамцыг Чингэлтэй дүүргийн цагдаагийн хэлтэст дуудсан боловч, өрөөндөө байхгүй, утсаа таслан зугтаасан аж. 

 

 

НУУЦ.мн