Р.Нямдорж : А.Сүхбат,дэд хурандаа Эрдэнэбат нар хууль бус үйл ажиллагаагаа зогсооно уу
Нийтэлсэн: 2016-12-09 07:08:02
Монголын Үндэсний бөхийн холбооны ээлжит “Их эе” хурал хуралдана, хуралдахгүй гэх маргаан үргэлжилсээр байна. УИХ-ын гишүүн, Дархан аварга А.Сүхбат тэргүүтэй хүмүүс мягмар гарагт хэвлэлийн бага хурал хийж уг хурал товлосон хугацаандаа болно гэж мэдэгдсэн. Ингэхдээ Р.Нямдорж гэдэг хүн бөхийн холбоог 26 жил хууль бусаар толгойлж байгаа явдлыг уг хурлаар таслан зогсооно хэмээн мэдээлсэн билээ. Харин нөгөө талд Р.Нямдорж “Их эе” хурал болохгүй гэх мэдэгдлийг гаргаж, бөхчүүдэд тараагаад байсан юм. Тэрбээр өнөөдөр хэвлэлийн бага хурал хийж, уг хурлыг хууль бус хэмээн мэдэгдлээ. Р.Нямдорж хэлэхдээ “Аварга Х.Баянмөнх, А.Сүхбат тэргүүтэй хүмүүс Монгол бөхийн өргөөнд 14 жил шунаж хэл ам хийж байна. Энэ хугацаанд над руу маш олон удаагийн дайралт хийсэн. “Их эе”-ийн хурлыг хуулийн дагуу зохион байгуулна хэмээн ярьж байна. Шүүхийн өмнө баримт бүрдүүлэх гэж маш олон хуурамч бичиг баримт үйлдсэнийг нь нотлох баримт надад бий. Тиймээс УИХ-ын гишүүн, Дархан аварга А.Сүхбат, болон түүний гар хөл болон ажиллаж байгаа Цагдаагийн дэд хурандаа Эрдэнэбат нар жинхэнэ хууль бус үйл ажиллагаагаа зогсооно уу” гэв.
НУУЦ.мн
