Дэмждэг баг нь аваргын төлөө тоглож байгааг сонсгох гэж талийгаач аавынхаа булш рүү бүтэн өдөржин явжээ
Нийтэлсэн: 2016-12-03 01:41:03
Сэтгэл хөдөлгөм явдал Умард Каролина мужид болжээ. 53 настай ахимаг эр Уэйн Уильямс бейсболын “Чикаго Кабс” баг дэлхийн цувралын АШТ-нд шалгарч аваргын төлөө тоглож байгаа тоглолтыг талийгаач аавдаа сонсгох гэж оршуулгын газар луу нь бүхэл өдөржин машинаараа явсан байна. Тоглолт эхлэхээс өмнө амжиж очиж булшин дээр нь гар утсаараа дэмждэг баг нь аваргын төлөө тоглож байгааг бурхан болсон аавдаа сонсгожээ.
Түүний талийгаач эцэг нь насан туршдаа “Чикаго Кабс” багийн үнэнч хөгжөөн дэмжигч байсан гэнэ. Тэнгисийн цэрэгт алба хаадаг байхдаа л энэ багийг дэмжиж эхэлсэн байна.
Олон арван жилийн турш дэмждэг баг нь уналтанд орж доод зиндаа хүртэл буурч бүр тарахдаа тулж байсан ч эцэг нь дэмжсээр иржээ. Тэрээр хүүдээ “Хэзээ нэгэн цагт “Чикаго Кабс” заавал аваргын төлөө тоглож түрүүлнэ. Тэр тоглолтыг хоюулаа хамт үзнэ шүү” гэж байнга хэлдэг байсан гэнэ. Гэсэн ч эцэг нь 1980 онд 63 насандаа нас баржээ. Харин дэмждэг баг нь энэ жил л дэлхийн цувралын аваргын төлөө тоглохоор шалгарч үлдсэн. Хүү нь амласан ёсоороо тэр тоглолтыг нь сонсгох гэж эцгийнхээ булш руу ийнхүү бүтэн өдөржин явсан байна.
-Амласан ёсоороо бид хоёр хамт тоглолт үзлээ. “Чикаго Кабс” түрүүллээ. Үүнийг аав маань дээрээс харсан байх учиртай-
NUUTS.mn
