Н.Алтанхуяг: Ц.Элбэгдоржийн үгэнд орохгүй бол шоронд ордог ийм Ардчиллын төлөө би яваагүй
Нийтэлсэн: 2016-12-01 00:43:16
Ерөнхий сайд асан Н.Алтанхуяг 16:30 минутын үед АТГ-т өөрийн биеэр ирж, мэдүүлэг өгөхөөсөө өмнө сэтгүүлчдэд мэдээлэл хийлээ. Тэрбээр “Өнөөдөр 14 цагийн үед надад зарлан дуудах ирсэн. Тэгээд би ирж байгаа юм. Ерөнхийлөгчид нэр дэвшинэ гээд хэлчихсэн чинь нэлээн үйл явдал өрнөх юм шиг байна. Мөн саяхан нэвтрүүлгээр ороод Монголын нийгэмд болохгүй байгаа зүйл, түүн дотор цөөн хэдэн хүн улсын хамаг баялагийг сорчлоод, завшаад байна гээд хэлчихсэн чинь манай Ц.Элбэгдорж болон түүний бүлэглэл их л амь тавьж байгаа бололтой. Цөөхөн хоногийн дотор гурав, дөрвөн эмэгтэй хүнийг шоронд хийлээ. Би өнгөрсөн 4-р сард манай Ерөнхийлөгч ба тэдний бүлэглэлийн бий болгочихсон хууль хяналтын байгууллага дотор хонгил байдаг гэж хэлж байсан. Тэр хонгил руу гаа шахаж оруулах гэж намайг их олон жил оролдож байгаа. Ерөнхий сайд байх цагаас эхлээд хэрэг төвөг элдэв зүйлээр худал үнэн, зохиомол хэрэг үүсгэдэг. Тэгээд миний ойр хавийн хүмүүсийг барьж хийгээд тэд нартай холбогдуулж зохиомол хэрэг оруулж байгаа байх. Надад айж ичих зүйл байхгүй. Үнэн хэзээд ялна гэж итгэж байна.
