“Приус”-ээ халааж байгаад шатсан хоёр залуу нэг гэр бүлийнх байжээ
Нийтэлсэн: 2016-11-22 01:10:05
Энэ сарын 11-нээс 12-нд шилжих шөнө Өвөрхангай аймгийн Сант сумын нутагт машин шатаж байна гэх дуудлага цагдаагийн байгууллагад ирсэн байна. Дуудлагын дагуу цагдаагийн алба хаагчид болон тус аймгийн онцгой байдлын алба хаагчид хэргийн газарт очиход жалга руу онхолдсон “Приус” маркийн автомашин шатаж байжээ. Галын улмаас Өвөрхангай аймгийн Арвайхээр сумын харъяат, 37 настай М, 41 настай Д нар шатаж, газар дээрээ амь насаа алдсан хэргийг Өвөрхангай аймгийн цагдаагийн газарт эрүүгийн хэрэг үүсгэн шалгаж байна. Дээрх хэрэг Сант сумын төвөөс 10 орчим км зайд болсон гэх ба шатсан автомашин дотор нас барсан хоёр иргэнээс гадна Сант сумын харъяат нэг иргэн хамт байжээ. Энэхүү хэргийн талаар тус сумын иргэн Г хэлэхдээ “Нас барсан хоёр залуу нэг айлын хүмүүс байсан. Манай нутгийн Д-ийн дунд хүү, түүний охины нөхөр(хүргэн) хоёр харамсалтайгаар нас барсан. Одоо ар гэрийнхэнд нь их л хэцүү байгаа дуулдаж байсан. Тэднийг саяхан хөдөөлүүлсэн. Тэр өдөр залуучууд сумын төвөөс хол очиж архи уусан шиг байгаа юм. Өнгөрсөн хүмүүсийн ар гэрийнхэн юу гэж энэ талаар ярих вэ. Олны ярьж байгаагаар, тийм шиг байна лээ. Хүмүүсийн ярьж байгаагаар тэд машиндаа ууж суугаад машинаа асаалттай нь унтсан гэсэн. Гал гарахад нэг нь сэрж үсэрч буугаад, нөгөө хоёр нь бууж амжилгүй жалга руу тэр чигтээ унаад, шатсан байхад нь олсон гэсэн” гэв.
NUUTS.mn
