"Эрдэнэт”-ийн захирлаар Ч.Ганзоригийг томилоход ашиг сонирхолын зөрчилтэй гэжээ
Төсвийн байнгын хорооны өчигдрийн хуралдааны үеэр УИХ-ын гишүүн Ц.Нямдорж “Эрдэнэт” үйлдвэрийн даргыг яагаад томилохгүй байна вэ. Надад ирүүлсэн мэдээллээр ирэх оны дөрөвдүгээр сар хүртэл хуучин удирдлага нь ажиллана гэж байна. Засгийн газар “Эрдэнэт” үйлдвэрийн 51 хувийг эзэмшиж байгаа шүү” гэсэн асуулт тавьсан. Үүнд ЗГХЭГ-ын дарга Ж.Мөнхбат хариулахдаа “Засгийн газар “Эрдэнэт” үйлдвэрийн Ерөнхий захирлыг яаралтай томилох байр суурин дээрээ хэвээр байгаа. Өнөөдрийн байдлаар хэнийг Ерөнхий захирлаар томилох вэ гэдэгт нэгдсэн шийдэлд хүрэх хэрэгтэй байна. “Эрдэнэт”-ийн Төлөөлөн удирдах зөвлөл өнөөдөр хуралдахад ч бэлэн. Гагцхүү хүний нөөцийн хувьд хэн байх вэ гэдэг шийдэлд хүрээгүй байна” гэсэн юм. Баттай эх сурвалжийн мэдээллэж буйгаар “Эрдэнэт” үйлдвэрийн гүйцэтгэх удирдлагад эрх баригч намаас Ч.Ганзоригийг санал болгож буй аж. Харин 49 хувийг эзэмшигч тал Ч.Ганзоригийг өмнө нь “Эрдэнэт” үйлдвэрийн гүйцэтгэх захирал байхдаа “Жаст”-ын Ш.Батхүүд тус үйлдвэрийг барьцаалан “Стандарт” банкнаас зээл олгох эрх олгосон гэх үндэслэлээр ашиг сонирхлын зөрчилтэй гэж үзэн, хүлээж авахаас татгалзаж буй юм байна. Сануулахад, “Жаст”-ын Ш.Батхүүгийн Өмнөд Африкийн “Стандарт” банкнаас авсан 109 сая ам.долларын зээлийн асуудал таван жилийн турш шүүхийн шатанд маргаан дэгдээж, эцэст нь Лондонгийн шүүхээс зээлийн үлдэгдэл 51 сая ам.долларыг хүүтэй нь, хүүгийн алдангитай, дээр нь нэмээд шүүхийн зардал 10 сая ам.долларыг манай улсын засгийн газар нэмж төлөхөөр болсон байдаг. Тухайн үед ТӨХ-ны дарга асан Д.Сугар болон “Эрдэнэт”-ийн гүйцэтгэх захирал асан Ч.Ганзориг нар уг зээлд “Эрдэнэт” үйлдвэрийг барьцаанд тавьснаа баталгаажуулж, гарын үсэг зурсан нь шүүхээр тогтоогдоод байгаа юм.
НУУЦ.мн
