2003 онд Назарбаевын өгсөн 5 мянган тонн талхыг хэн идсэн бэ...
Нийтэлсэн: 2016-11-15 01:01:42
Өчигдрийн цахим ертөнцийн гол шуугиан нь баян чинээлэг Казакстан өлсгөлөн ядуу монголчуудыг жил бүр 5 мянган тонн талхаар тэжээж ирсэн явдал байлаа. Казакстандаа Мао мэт хүндэлэгддэг ерөнхийлөгчийх нь ярианы гол агуулга нь талх бус харин ардчилалд байсан. Өөрөө дарангуйлагч төрийн тэргүүн гэдэг дэлхий нийтэд илт болсон удирдагчийн хувьд ардчилал хөгжсөн хэмээн гайхуулаад байгаа Монгол мэт нь биднээр тэжээлгэж байна, ардчилалын сайн зүйл гэж бараг үгүй гэх санааг агуулж байсан. Харин бидэнд өлгөлөнд нэрвэгдсэн, тусламжийн талхаар гол зогоодог зэрэг нь доромжлол мэт санагдсан. Гэхдээ шуугиад байгаа яриа нь аль тэртээх 2003 оны үйл явдал болох нь нэгэнт тогтоогджээ. Харин тэр үед үнэхээр тусламжийн гурил талх орж ирсэн бол тэрийг хэн гэдэг дарга нь залгилсан нь л бидний шуугих зүйл юм. Түүнээс гадна гадаад улсын ерөнхийлөгчөөр гуйлгачин ядуугаараа дуудуулж байгаа нь бас л бидний арчаагүйнх. Харин ч үүгээр далимдуулан зарим нэг нь үндэсний цөөнх болох казакууд руу дайрсан нь тэдний дургүйг хүргэсэн байна.
