43 сая доллар хожсон эмэгтэйд автомат машин гэмтэлтэй гээд хожлын мөнгийг нь өгөхөөс татгалзжээ
Нийтэлсэн: 2016-11-03 00:57:01
Америкийн хуулиар хэрвээ казиногийн автомат машин нь ямар нэгэн гэмтэлтэй байсан нь тогтоогдвол тэр машинаас гарсан бүх хожлыг хүчингүйд тооцдог гэнэ. Чухам энэ л хуулийн цоорхойг ашиглан миний хожлын 43 сая долларыг өгөхгүй байна хэмээн Нью-Йорк хотын иргэн, дөрвөн хүүхдийн эх өрх толгойлсон эмэгтэй Катрина Букман Атлантик - Ситигийн Resort World Casino-той шүүхдэлцэж явна. Хэрэг явдал өнгөрсөн сарын эхээр болжээ. Тус казиногийн автомат тоглоомоор тоглож байсан Катрина жэк-пот хийж 43 сая доллар хожжээ. Тоглоомны дэлгэц дээр мөнгөн дүн нь хүртэл гарч ирсэн байна.
-Тэр үед үгээр өгүүлэхийн аргагүй мэдрэмж төрсөн. Хамаг бие маань халуу шатаад л явчихсан-
Тэрээр маш их мөнгө хожсоноо эргэн тойронд байсан хүмүүсдээ зарлаж бас селфи хийн баримтжуулж авчээ. Яаралтай ирсэн хамгаалалтынхан чекээ аваад маргааш ирж казиногийн удирдлагатай уулз гээд бушуухан гаргасан гэнэ. Баярлан хөөрсөн эмэгтэй хожлын мөнгөө юунд зарцуулахаа бодон шөнөжин унтаагүй аж. Эхний ээлжинд үсчний мэргэжилтэй том хүүдээ үсчний газар худалдан авч өгөхөөр шийдсэн байжээ. Өөрөө бүтэн өнчин тэрээр асрамжийн газарт өсжээ. Одоо ч дөрвөн хүүхдээ ганцаараа өсгөж байгаа аж.
Маргааш нь казинод иртэл түүнийг 43 сая доллар биш ердөө 2,5-хан доллар хожсон болохыг хэлж “цус харвуулах” дөхжээ. Казиногийн захиргаа баахан баримт сэлт бэлдсэн байсан гэнэ. Катринагийн тоглосон Sphinx гэдэг машины сертификатыг ч хүртэл үзүүлжээ. Уг сертификатаар машин нь хамгийн бага мөнгөөр тоглодог тоглогчидод зориулагдсан доод зэрэглэлийнх, хожлын дээд хязгаар нь ердөө 6500 доллар гэнэ. Хамгийн бага зэрэглэлийн машин атлаа 43 сая долларын хожил зааж байгаа нь эвдрэлтэй гэмтэлтэй байсны баталгаа гэж казиногийн удирдлага зүтгэжээ. Мөн их мөнгө авна гэж ирээд цочролд орсон эмэгтэйг тайвшруулж 2,5 долларыг нь өгөөд казиногийн хамгийн тансаг зоогийн газарт дуртай хоолоо захиалж идээд яв гэж аргалах гэсэн байна. Харин Катрина зүгээр нэг явсангүй. Тэрээр өмгөөлөгч хөлслөөд шүүхдэлцэж эхэлжээ.
NUUTS.mn
