Ерөнхийлөгч Пак Гын Хег нууцаар удирддаг гэх Чуй Сүн Шил тайлбар өгөхдөө уйлжээ
Өмнөд Солонгос улсын Ерөнхийлөгч Пак Гын Хе-тэй холбоотой хэргээр гадаадаас эх орондоо очоод байгаа бизнес эрхлэгч Чуй Сүн Шил, өнөөдөр цагдаагийн газар мэдүүлэг өгөхөөр очсон байна. Түүнийг Сөүл хотын цагдаагийн газар мэдүүлэг өгөхөөр очиход 100 гаруй сэтгүүлч яриа авахаар хүлээж байсан ажээ.
Бизнес эрхлэгч Чуй Сүн Шил нь автомашинаас буусан даруй түүнийг тойрон бүчсэн сэтгүүлчдэд хандаж "Би өршөөж болшгүй маш их буруутай, намайг уучлаарай" гэж хэлэхдээ уйлж байсан байна. Сэтгүүлчид түүний зургийг ойроос авахын тулд өөр хоорондоо түлхэлцэж байсны улмаас Чуй Сүн Шил-ийн өмсөж байсан "Прада" брэндийн гутал сугарч хоцорсон ажээ.
Бизнес эрхлэгч Чуй Сүн Шил-ийн өмгөөлөгч хэлэхдээ "Чуй Сүн Шил нь түүний тухай үнэн бат биш мэдээллүүд хэвлэл мэдээллийн хэрэгслээр тархсаны улмаас сэтгэл санааны хүнд байдалд орсон байгаа. Ялангуяа түүний гэр бүлийн гишүүдэд халдаж, морин спортоор хичээллэдэг охиныг интернэтээр эрэн сурвалжилж байгаа нь зохистой үйлдэл биш юм. Гэхдээ Чуй Сүн Шил цагдаагийн газарт бүрэн дүүрэн мэдүүлэг өгөх болно" гэж мэдэгдсэн байна.
Эх сурвалж : mglradio.com
