Үнсэлцэх үед кокайн биед нь “нэвтэрсэн” хэмээн дэлхий аваргын эрхийг хасахаас татгалзжээ
Нийтэлсэн: 2016-10-08 02:55:34
Сэргээш хэрэглэсэнээ хамгийн тэнэг гэмээр хэлбэрээр тайлбарласан ч Олон улсын Хөнгөн атлетикийн холбоо итгэсэн хэрэг спортын ертөнцийг шуугиулж байгаа тухай BBC мэдээлжээ. Канадын Хөнгөн атлетикийн холбоо тулгууртай харайлтын дэлхийн аварга, 22 настай тамирчин Шон Барнерээс кокайн илэрсэн хэмээн тэмцээн уралдаанд орох эрхийг нь хоёр жилээр хасах шийтгэлийг оногдуулахаар зэхэж байсан. Түүний хэргийг эхлээд холбооны Ёс зүйн хороогоор авч хэлэлцэхэд дээрхи “үнэмшилтэй” нь аргагүй тайлбарыг гаргаж өгсөнд хороо хүлээн авчээ. Хорооны дүгнэлтийг холбоо нь ч дэмжжээ. Тэгээд ч илэрсэн хэмжээ нь маш өчүүхэн тул авч үзэхэд хангалтгүй гэж нэмж дурджээ. Улсынхаа хөнгөн атлетикийн холбоог Ёс зүйн хороотой нь хамт “маллаж” дөнгөсөн Шон өмнө нь хар тамхины төрлийн бодис хэрэглэсэнээ санаатайгаар “нуун дарагдуулсан” бүсгүйтэй үнсэлцэх үед уг бодис биед нь нэвтэрсэн гэж баталсан байна. Риогийн Олимпийн өмнө тэрээр маш эрчимтэй дасгал сургуулилалт хийсэн тул стресс дарамтаа сексээр тайлахаар шийджээ. Гэхдээ архи, хар тамхи хэрэглэсэн эмэгтэйтэй учирч болох тул баар цэнгээний газраар ороогүй гэнэ. Түүний оронд танилцах сайтаар дамжуулан архи тамхи хар тамхи болон ямар нэгэн төрлийн сэргээшийн төрлийн бодис хэрэглээгүй бүсгүйтэй танилцана хэмээн зар оруулсан болохоо Ёс зүйн хороонд баримтаар гаргаж өгчээ. Уг зарын дагуу нэгэн бүсгүй түүнтэй холбогдсон ч түүнтэй бэлгийн харьцаанд ороогүй харин 4-5 удаа үнсэлцжээ. Гэтэл тэр бүсгүй өмнө нь кокайн хэрэглэсэн байснаа Шонд хэлээгүй нууснаас үнсэлцэх замаар уг бодис биенд нь нэвтэрсэн гэнэ. Ийнхүү тэрээр өөрөө санаатай хэрэглэсэн болж таараагүй тул Ёс зүйн хороо нь хориотой бодис хэрэглэсэн гэж үзэхгүй гэсэн шийдвэр гаргажээ. Канадын хөнгөн атлетикийн холбоо энэ шийдвэрийг үндэслэн тамирчнаа хамгаалсан баримт материалыг Дэлхийн хөнгөн атлетикийн холбоонд явуулж улмаар Шоны кокайн хэрэглэсэн гэх хэргийг бүрмөсөн хаалгасан байна.
НУУЦ.мн
