“Эрдэнэт” үйлдвэрийн хувьчлалыг хүчингүй болголоо
Олон нийтийн шахалтанд орсон эрх баригчид аргагүйдэж анх удаагаа шахуу ард түмний төлөө шийдвэр гаргалаа. Засгийн газрын хуралдаанаар "Эрдэнэт” үйлдвэр, "Монголросцветмет” компанийн 49 хувийг худалдсантай холбоотой асуудлыг судлах үүрэг бүхий ажлын хэсгийн дүгнэлтийг сонсож хэлэлцсэн. Дүгнэлтийг авч хэлэлцсэний дараа Эрдэнэт үйлдвэрийн 49 хувийг хувьчлахтай холбоотой өмнөх засгийн үед гаргасан бүхий л тогтоол шийдвэрүүдийг хүчингүй болгохоор шийдвэрлэсэн тухай Ерөнхий сайдын ажлын албанаас мэдээллээ. Үүнд :
- Хувьцаа худалдсаны дараа дээрх хоёр компанид 51:49 хувийн хувьцааны эрх мэдлийн харьцаа алдагдсан байна. Иймд "Эрдэнэт” үйлдвэр, "Монголросцветмет” компанийн ТУЗ болон гүйцэтгэх удирдлагад төр 51 хувийн эрх мэдлээ хэрэгжүүлэх чиглэлээр холбогдох дүрэм, журмыг өөрчилж хяналт тавьж ажиллахыг холбогдох сайд нарт даалгалаа.
- 2016 оны зургадугаар сарын 2-ны өдрөөс 29-ний хооронд "Эрдэнэт” үйлдвэртэй холбоотойгоор гаргасан Сангийн сайдын тушаалуудыг хүчингүй болгов.
- "Эрдэнэт” үйлдвэрийн 49 хувийн хувьцааг худалдах асуудлыг хэлэлэлцсэн 2016 оны зургадугаар сарын 13-ны өдрийн Засгийн газрын хуралдааны тэмдэглэл, мэдээллийг олон нийтэд ил тод хүргэхээр болов.
- "Эрдэнэт” үйлдвэрийн 49 хувийн хувьцааг худалдаж авах санхүүгийн эх үүсвэрийг нэр бүхий арилжааны банкнаас гаргасан байх тул хуульд заасан эрхийн дагуу энэ үйл ажиллагааг шалгаж танилцуулахыг Монголбанкинд даалгажээ.
НУУЦ.мн
