Нууц мэдээллийн уурхай

Энэ түүх нь 50 жил ажилласан төрөлх их сургуульдаа их хэмжээний мөнгө гэрээслэж үлдээхийн тулд асар их тэвчээр зориг гаргасан номын санч Роберт Морины тухай юм. Өдгөө Нью-Гэмпширын их сургуулийнхан түүний үйлдэлд бахдан бахархаж байгаа ч бурханы оронд  заларсан тэрээр  сонсохгүй нь харамсалтай.

Морин тус их сургуульд 50 жил номын санчаар тасралтгүй ажиллаад 2014 онд тэтгэвэрдээ гарчээ. Энэ олон жилийн турш эдийн засгийн хямралын үед ч номын санчийг тэтгэвэрийн нас хэтэрсэн байхад ч их сургуулийн захиргаа халаагүй гэнэ. Үүнд нь талийгаач их талархалтай явдаг байжээ. Түүнийг мэдэх хүмүүс маш энгийн даруухан амьдардагийг нь гайхдаг байжээ. Комиссын дэлгүүрээс хувцаслаж хуучирч муудсан “Плимут” машинаа сольсонгүй. Өглөөний цай нь чипс кола, үдийн хоол нь хачиртай талх төдий байсан гэнэ. Гэрт нь тавилга гээд юм байхгүй болохыг таньж мэдэх хүмүүс нь гайхан ярилцдаг байж. Өнгөрсөн жил тэрээр 77 насандаа бурхан болсон агаад бүх хөрөнгөө их сургуульдаа гэрээслэжээ. Гэрээслэл ёсоор нийтдээ дөрвөн сая доллар их сургуульд шилжин ирсэн нь бүгдийг гайхшруулсан гэнэ. Хэн ч шинжлэх ухааны бүхий л салбарын асуудлаар оюутнуудтай маргалдах дуртай, хэрүүл маргаанаас зайлхийдэг номын санч өвгөнд тийм их хөрөнгө байсныг тааварлаагүй аж. Морин дөрвөн сая доллароосоо 100 мянгыг нь насаараа ажилласан номын санд зориулахыг гэрээслэжээ.

Мөн нэг сая долларыг шинээр баригдаж байгаа их сургуулийн цэнгэлдэхийн санхүүжилтанд хандивлажээ. Үлдсэн мөнгийг их сургуулийн захиргааны мэдэлд үлдээсэн байна.

Сургуулийн ахмад багш нарын таамаглаж байгаагаар талийгаач 50 жилийн турш их сургуулиас авсан цалингаа үрэлгүй хадгалаад бүр өсгөөд буцааж өгсөн гэнэ.