Цэцэрлэгийн машинд найман цаг түгжигдсэн охин агааргүйдэж амиа алджээ
Нийтэлсэн: 2016-09-12 07:29:40
Thepaper.cn-д мэдээлснээр Тяньжин хотын нэгэн хувийн цэцэрлэгийн хүүхэд зөөдөг микроавтобусанд түгжигдсэн дөрвөн настай охин агааргүйдсэнээс амиа алджээ. Жолооч нь ердөө л хүүхэд байгааг мартан халуун өдөр машинаа зогсоолд тавин орхисноос ийм аймшигтай явдал болсон гэнэ. Энэ хэрэгт холбогдуулан 37 настай жолооч, түүний эхнэр болох цэцэрлэгийн эрхлэгчийг баривчилжээ. Хэрэгтэн өглөө охиныг аваад цэцэрлэгт хүргэх замдаа машиныхаа нэг гэмтлийг янзлуулсан, энэ үеэс л нэг хүүхэд ард нь байгааг таг мартсан хэмээн мэдүүлжээ. Цэцэрлэг тарахын өмнөхөн машинаа авахаар ирэхэд охин аль хэдийн амиа алдсан байжээ. Хувийн цэцэрлэгийн ажилтнуудын дэндүү хайхрамжгүйгээс болж хүүхдээ алдсан эцэг эх болон хамаатнууд нь эсэргүүцлийн цуглаан хийсэн байна. Сандарсан эрх баригчид тус цэцэрлэгийг хаажээ.
