Нууц мэдээллийн уурхай

Ардчилсан намын Онцгой комиссын хяналтын ерөнхий хорооны нарийн бичгийн дарга Б.Батхуяг, Намын байгуулалтын газрын дарга Л.Уртнасан, нийслэлийн Багахангай дүүргийн  АН-ын гишүүн, нэр дэвшигч Б.Анхбаяр нар мэдээлэл хийлээ. Онцгой комиссын хяналтын ерөнхий хорооны нарийн бичгийн дарга Б.Батхуяг “2016 оны орон нутгийн сонгуульд нэр дэвшүүлэх ажиллагааны хуулийн хугацаа дууссан ч хууль зөрчсөн үйлдлүүд их гарсан байна. Орон нутгийн сонгуульд 14300 орчим нэр дэвшигч байгаа. Есөн аймагт Ардчилсан намын 100 орчим нэр дэвшигчийг бүртгэхээс татгалзсан байна. Улс төрийн нэг хүчний үйл ажиллагааг дэмжсэн, эрх баригч намын нэр дэвшигчээс татгалзсан тогтоол нэг ч гараагүй байна. Гэтэл төрийн сонгуулийг удирдан зохион байгуулж явдаг төрийн албан хаагчид хэрээс хэтэрсэн үйлдлүүд ихээр гаргадаг болжээ. Тухайлбал, нэр дэвшигчдийн гарын үсгийн хэв буруу, бичиг баримт дутуу гэх үл ялиг зүйлээр шалтагласан, хууль зүйн үндэслэлгүй, улс төрийн нэг хүчний талыг баримталсан байна. Архангай аймгийн Өлзийт сумын Ардчилсан намаас нэр дэвшсэн 21 хүнийг тэр чигт хассан байна. Өгийнуур, Жаргалант сумаас тус, тус нэг нэр дэвшигч, Өмнөговь аймгийн ханхонгор сумын 21 нэр дэвшигчийг бүгдийг нь хассан байна. Улаанбаатар хотын Багахангай дүүргийн 17 нэр дэвшигч, Баянхонгор аймгийн Шинэжинст сумын, Дорноговь аймгийн Даланжаргалант сумын хоёр нэр дэвшигчийг хассан байна. Нийт Ардчилсан намын 100 орчим нэр дэвшигчийг бүртгээгүй байна. Энэ нь тэдний Үндсэн хуулиар олгогдсон эрхийг ноцтой зөрчиж байна. Энэ удаагийн орон нутгийн сонгуульд нэг улс төрийн хүчин оролцож байгаа юм шиг битгий хандаач, улс төрийн соёлтой байгаач гэж хэлмээр байна. Орон нутгийн сонгуульд оролцож байгаа улс төрийн хүчнүүдийн үйл ажиллагааг хэвийн явуулж, үндсэн хуулиа дээдэлж ажиллахыг эрх баригч намаас шаардаж байна” гэлээ. Мөн УИХ-ын болон аймаг нийслэлийн Иргэдийн Төлөөлөгчдийн хурлын сонгуулиар “царцааны нүүдэл”-ийг сонгогчдын шилжих хөдөлгөөнийг сонгуулийн дүнд нөлөөлөх байдлаар зохион байгуулсан байна гэж Үндсэн хуулийн цэцэд хандсан байна. Ингэхдээ Монгол Улсын иргэн аль нэгэн газар оршин сууж санал өгөх эрх нь нээлттэй байгаа учраас та бүхнийг хэргийг хэрэгсэхгүй болгож байна гэсэн ҮХЦ-ийн гишүүний дүгнэлт гарсан. Хууль тогтоомжийг зөрчөөд, төрийн эрх мэдлийг авахыг тулд ажилчид болон ах дүү нараа өөр хаяг руу шилжүүлж санал өгүүлж байгаа нь хууль зөрчсөн үйлдэл. Тиймээс дараагийн шат болон ҮХЦ-ийн дунд суудлын хуралдаанаар энэ гомдлыг хэлэлцүүлнэ. Нэг хаяг дээр 40,50-иараа оршин сууж сонгууль өгдөг маргаан явж байгаа. Үүнийг хууль хяналтын байгууллагад хандсан байгаа гэлээ.