Цалингүй цагдаагийнхан “бид та нарыг хамгаалж чадахгүй” гэсэн бичигтэй тамирчдыг угтжээ
Нийтэлсэн: 2016-08-04 02:45:49
Риогийн олимп Сочигийнхоос ч муу бэлтгэлтэй, зохион байгуулалт хамгаалалт муутай болж байгаа тухай дэлхийн хэвлэлүүд бичиж байна. Үүний тод жишээ нь Риогийн нисэх буудалд болсон цагдаа нарын эсэргүүцэл гэнэ. Хэсэг цагдаа нар “Тамд тавтай морил. Цагдаа болон гал командынхны цалинг өгөөгүй тул Риод ирж байгаа хүмүүсийг бид хамгаалж чадахгүй” гэсэн бичиг барин тамирчдыг угтаж айдас болгоомжлол дэгдээсэн байна. Би-Би-Си агентлагийн мэдээлснээр Бразилийн Засгийн газар нь одоогийн байдлаар 860 сая долларын цалингүй өртэй байгаа аж. Цагдаа нарт цалинг нь өгөх нь байтугай, бичгийн цаас, ариун цэврийн хэрэгсэл зэрэг үйл ажиллагааны наад захын зардлыг нь санхүүжүүлж чадахгүй байгаа тул гэрээсээ ариун цэврийн цаас, бичгийн цаасыг авчирдаг болжээ. Өчигдөрхөн гэхэд Риогийн гудамжаар зугаалж явсан Шинэ Зеландын жиу-жицугийн тамирчин Жэйсон Лиг гэгээн цагаан өдөр дээрэмдсэн байна. Түүнийг цагдаагийн машинтай ирсэн цагдаагийн хувцас өмссөн хүмүүс зогсоон бичиг баримтын зөрчил нэрээр торгуулийн мөнгө нэхжээ. Жэйсонд бэлэн мөнгө байхгүй байсанд буу тулган машинд суулгаж ойролцоох АТМ-аас 20 мянган риал буюу 600 доллар хүчээр гаргуулж аваад хотын захад хаяад алга болсон гэнэ. 7-р сарын 29-нд Австралийн багийн хотхонд гал гарсан. Байраа яаралтай орхиод гарсан тамирчдыг галыг унтраасны дараа буцан ирэхэд нотебуук, хувцас хунар зэргийг нь аль хэдийн авчихсан байсан гэнэ.
НУУЦ.мн
