Нууц мэдээллийн уурхай

Энэ нь намын даргых нь хувийн шинж чанар онцлогтой холбоотой гэнэ. М.Энхболд  нь олон удаа Үндэсний баяр наадамын комиссын даргаар ажилласан.  ММСУХ-ны тэргүүний ажлаа сонгуулийн өмнө өгсөн гэдэг ч хашир хандгай цаагуураа “атгаастай” байх магадлалтай.  Улс удирдах нь наадам хийх морь уяхтай адилхан баймааргүй юм. Өдгөө бөхчүүд уяачидтай энэ засагт сурчид шагайн харваачид л дутуу байна. Хүүхдийн олон байгууллагийнхаа нэгнийх нь даргаар унаач хүүхдээ тавибал бүр ч гоё болно. Бүр ХХААХҮЯ-ны Төрийн нарийн бичгийн даргаар бас л уяач хүн томилогдох нь гэсэн яриа гарсан. Үнэн байх магадлалтай. Хэрвээ уяачдаар дүүрсэн Засгийн газар байгуулагдвал Монголын ард түмэн хөлслүүлж, сунгаанд давхиж хөлсөө хусуулж хүчтэй тариандаа мансуурч, олон удаагийн уралдаанд эзэндээ “ланд” авч өгөх гэж давхисаар хөл туурайгүй болох юм байна даа. Эцэст нь дөрвөн жилийн дараа айрагдах нь бүү хэл дэлхийн улсуудын адагт баян ходоод хэвээрээ үлдвэл яах билээ… Эрчим хүчний сайдад нэр дэшигч өмнө нь тус яамны дэд сайд хийж байсан Т.Энхтайван цагтаа “гоё халиун” гэдэг хурдан хүлэгтэй байсан.  Бүсгүй хүний гоо сайханг үнэлэхдээ “миний гоё халиун шиг” гэдэг тухай шуугиан хэдэн жилийн өмнө дэгдэж байсан. Хүнс, хөдөө аж ахуй, хөнгөн үйлдвэрийн сайдад нэр дэвшигч Морин спорт, уяачдын холбооны тэргүүн Т.Сэргэлэнд нэгээр зогсохгүй хурдан хүлгүүд байгаа биз. Барилга хот байгуулалтын сайдад нэр дэвшигч  Г.Мөнхбаяр нь морь биш бөмбөг хөөдөг. Э.Бат-Үүл дөрвөн жилийн өмнө хотын дарга болоод “ямбийрсан машин жолоодож байгаа юм шиг байна” гэж халаглаж байсан. Тэр “ямбий машин” хүлээлгэж өгсөн нөхөр нь Г.Мөнхбаяр болж таарсан. Эрүүл мэндийн сайдад нэр дэвшигч Арьсны өвчин судлалын үндэсний төвийн захирал А.Цогцэцэг нь намын дарга М.Энхболдтой хамаатан садны холбоотой гэдэг яриа гарч байсан. Түүнийг ардаа эмнэлгийн бизнестэй эсэхийг АТГ олоод тогтоох биз. Энэ шалгуурт унах өндөр магадлалтай байж магадгүй юм.