Нууц мэдээллийн уурхай

Оросд бурханы оронд хөнгөлөлттэй тарифаар очиж болох хямдралын сарын аян зарласан «Бюро ритуальных услуг» гэдэг компани шуугиан тарьжээ. Тэд хямдралын купоноо Пермь хотын 55-аас дээш бүх насныханд гэрийн хаягаар нь явуулсан байжээ.

Сарын дотор багтаж нүд анивал буяны ажлыг нь 15 хувийн хямдралтай үнээр хийж өгнө гэсэн эелдэг үгтэй таницуулгыг уншсан зарим хөгшчүүд муужирч унах шахсан гэнэ. Даралт нь ихэссэн хэдэн хөгшдийг эмнэлэгт хүргэсэн тухай ар гэрийнхэн нь орон нутгийн  «Рифей» телевизд хандсан аж.  

57 настай ахмад настан Борис Медведев “Эрүүл саруул энх тунх яваа хүнд яаж ийм таницуулга явуулж зүрхэлдэг байна вэ … Энэ компанийханд ямар ёс зүй хүн чанар гэж алга. Иймэрхүү нөхдүүдийг хатуу шийтгэх хэрэгтэй. Үүнээс болж миний зүрх өвдсөн. Хоёр жилийн өмнө хотын эмнэлэгүүдэд хэвтэж байсан хүнд өвчтэй ахмадуудад бас иймэрхүү хямдралын купон тараах гэж оролдож байсан” гэж гомдолложээ.

Харин «Бюро ритуальных услуг» компаний захирал хямдралын сарын аяны ачаар олон үйлчлүүлэгчтэй болж захиалга сайн авсан талаараа хэнэг ч үгүй ярьжээ.