Солонгосд “залхуучуудын” ДАШТ болж байна
Нийтэлсэн: 2016-06-17 07:47:40
Сөүлд юу ч үл хийгчдийн АШТ болж энэ удаад 70 гаруй “тамирчид” өрсөлдөж байна. Мөн гадаадаас оролцогчид ирсэн тул дэлхийн гэж хэлж болох гэнэ. Энэ тэмцээний гол шалгуур нь оролцогчид нь юу ч хийдэггүй бөгөөд мөн юуг ч үл анзаарах учиртай гэнэ. Space Out Competition буюу монголчилбол “өөрсдийгөө ухамсартайгаар “унтраах” өрсөлдөөн” гэсэн нэртэй энэ ер бусын тэмцээнийг санаачлагч нь зураач эмэгтэй Вупс Ян аж. Тэрээр орчин үед хүмүүс ажлаас болж маш их ядарч зүдэрч зовж байгаа тул энэ мэтээр түр ч гэсэн хорвоогоос “ангижирч” биеэрээ юу ч хийхгүй тархиараа юу ч бодохгүй байх хэрэгтэй гэж үздэг. Зураач өөрөө ажил амьдралын хэт ачааллаас болж сэтгэлзүйн хувьд “өөрөө өөрийгөө шатаах” хэмээн эмч нарын оношилж байгаа эмгэгээр олон жил зовжээ. Эцэст нь ийнхүү хэсэгтээ юу ч хийхгүй юу ч анхаарахгүй байхаар шийдсэн нь тун сайн арга бас эм болжээ. Тэмцээн нь 90 минут үргэлжилдэг гэнэ. Оролцогчид биеийн ямар нэгэн хөдөлгөөн хийх ёсгүй бгөөд мөн оюун санаагаа ч бүрэн “унтраах ёстой” аж. Шүүгч нар оролцогчдын эгнээгээр явж унтсан, зүүрмэглэсэн, инээсэн болон бусад сэтгэл хөдлөлийн илэрхийлэл гаргасан тамирчдыг хасдаг. Мөн 15 минут тутамд зүрхний цохилт, даралт хэмжиж өндөр гарсаныг нь мөн хасдаг. Ингээд өөрийгөө бүрэн унтрааж чадсан тэсвэртэй тогтвортой нь ялдаг гэнэ.
