Нууц мэдээллийн уурхай

УИХ завсарлаад бараг сар болж банйа. УИХ-ын дарга З.Энхболд өнгөрсөн сарын 24-нд гэнэтхэн захирамж гаргаж хаврын чуулганыг завсарлуулсан билээ. Түүний захирамждаа дурдсаны дагуу бол энэ УИХ бүрэн эрхийн хугацааныхаа хамгийн отгон чуулганыг энэ сарын 23-наас үргэлжлүүлэн хуралдуулах ёстой. Гэвч захирамж гарсан даруйд “Сонгуулийн сурталчилгааны үеэр гишүүд тойргийн ажлаа орхиод чуулгандаа суухаар ирнэ гэж байхгүй. Ирцгээлээ ч ирц бүрдэхгүй” гэх байр суурийг олон гишүүн, мөн МАН-ын бүлэг илэрхийлсэн. Тэдний энэ дүгнэлт хэр зэрэг өндөр магадлалтайг тооцоолж үзье. Хамгийн эхлээд УИХ-ын 76 гишүүний хэд нь чуулганы хуралдаанд ирэх боломжтойг тооцох нь зөв байх. УИХ-ын 76 гишүүний 31 нь нийслэлийн дүүргүүдэд нэр дэвшиж байна. Тэгэхээр энэ хүмүүс ажилдаа ирэх боломжтой гэсэн үг. Дээрээс нь энэ удаагийн УИХ-ын сонгуульд нэр дэвшээгүй есөн гишүүн (Р.Амаржаргал, Су.Батболд, Ж.Батсуурь, Ц.Баярсайхан, Ц.Дашдорж, Д.Дэмбэрэл, Ё.Отгонбаяр, С.Оюун, Л.Цог) бий. Үлдсэн 36 нь орон нутагт нэр дэвшиж байгаа учраас Төв аймагт нэр дэвшиж буй хоёроос бусад нь ирэхгүй байх магадлалтай. Тэр хоёр ирэхгүй ч байсан нийслэлд нэр дэвшиж буй 31, нэр дэвшээгүй есөн гишүүн нийлээд ирцийг хангалттай бүрдүүлнэ.