Англи эрийн паспортын зураг Хитлертэй усны дусал шиг ижилхэн хэвлэгджээ
Нийтэлсэн: 2016-06-06 07:49:10
Манчестер хотын 50 настай хижээл эр Стюард Бойд шинэ гадаад паспортынхоо зургийг хараад мэл гайхаж цэл хөхөрчээ. 10 жилийн хугацаанд хүчинтэй гарсан гадаад паспортын зураг нь нацист Германы удирдагч Адольф Хитлертэй маш адилхан гарсан аж. Хүн бүрийн зураг хөөрхөн муухай гардаг ч энэ удаад арай л хэтэрсэн гэнэ. Түүний нүүр царайн төрхнөөс гадна дээд уруулдаа Хитлер шиг сахалтай гарсан нь хэвлэлтийн алдаа байсан нь хэнд ч илхэн аж. “Гадаад паспортныхоо зургийг хараад эхлээд цочирдож дараа нь уур хүрлээ. Бурхан минь би энэ аймаар зурагтай паспортоор ахин 10 жил хил нэвтрэх нь гэхээс уушиг зүрх минь сагсайж бүртгэлийн хэлтсийнхэнтэй хэрүүл хийлээ. Гэтэл гайхалтай нь нэгэнт гарсан зургийг хэн ч засах янзлах боломжгүй гэдэг байгаа” хэмээн тэрээр хэвлэлд ярьжээ. Аль ч орны төрийн байгууллагын жишгээр Английн бүртгэлийн албаныхан зургийг алдаатай гарсан гэж хүлээн зөвшөөрсөнгүй. Харин ч дээд зэргийн нарийн хяналт стандартын дагуу гадаад паспорт хэвлэгддэг гээд халгаасангүй аж. Аргаа барсан эр хамаатан саднаасаа аврал эртэл тэд туслахын оронд одоо болтол шоолж дооглож байгаа гэнэ.
