Баянхонгорчууд Н.Түвшинбаярыг “чулуу шидэж” хөөнө
Бүх хүн “бүдүүн баараг” гэдэг. Аймаг бүр алдартай бөхөө өөрсдийн төлөөлөл болгон УИХ-д суулгаад байж болно. Гэхдээ нэгээс илүү хэрэггүй биз. Хэрвээ тоо нь хэтрээд явчихвал сонгогчид нь өөрсдөө “бүдүүн баараг” болж харагдах аюултай. Өдгөө хонгор нутгийнхан ийм сонголтын өмнө ирээд байна. Тэд “Женко” Х.Баттулга гэдэг бөх төлөөлөлтэй ч олимпийн аварга Н.Түвшинбаяр гэдэг бас нэгэн алдартай бөх нутгаас нь сонгогдоно гээд хүрээд иржээ. Бүр хамгийн сайн чаддаг зүйл болох барилдах ноцолдох нь дөхөөд Риогийн олимп хаяанд тулаад байхад шүү… Харин олимпийн аварга Риог бус харин ундаалж өссөн Заг голынхоо тухай л ярьж байна. Үүнийг нь сонссон төрсөн нутаг, олимпийн аваргыг төрүүлсэн гэх булганчуудад ямар байгаа нь ойлгомжтой. Баянхонгорын төлөөлөл “Жэнко” улс орныг шуугиулсан сандаасан том дуулианд нэр холбогдлоо. Гүйцэтгэх ажлыг нь эрхэлж байсан залуус нь гадаадад зугтааж гараад эсвэл гадаадаас ирэхгүй байна. Н.Энхбаярыг дүүгээ зугтаалгасан гэдэг бол энэ шүүмжлэл бас л “Жэнко”-гийн нэр дээр тусаж эхэлсэн. Тэгвэл сонгогдсон нэг бөх нь ийнхүү “бужигнуулж” байхад ахиад нэгийг гаргахын хэрэг байгаас эсэхэд баянхонгорчууд эргэлзэж эхэлжээ. Түүнээс гадна Н.Түвшинбаярын УИХ-ын гишүүн болох гээд байгаа зорилго нь одоо ч гэсэн тодорхойгүй байна. Хонгор нутгийн төлөө зүтгэх гэж байгаа гэж ярьдаг ч гишүүн болсон хойноо нэг том улстөрчийн дохио зангаагаар явдаг, түүний “улаан хамгаалагч” нь болчихож магадгүй гэсэн хардлага бас л үндэслэлтэй. Нөгөө том улстөрчийнх нь олон “хамгаалагч” нэр дэвших эрхээ авч чадсангүй, “тогооны” гадуур үлдсэн. Харин одоо нэр алдартай нэг ч гэсэн хүн хэрэгтэй болж. Түүний улстөр, эдийн засгийн мэдлэг боловсрол нь тийм ч чухал биш харин чих зөөлөнтөй л байх хэрэгтэй гэнэ. Тэгвэл хонгорчуудад ийм хүн хэрэггүй агаад ард түмний итгэлийг хувийн улстөрийн ашиг сонирхолдоо ашиглах эрх дархлагдсан гишүүдэд байхгүй. Ийм ч учраас сонгогчдын ухаалаг хэсэг нь нэр дэвшигчийг ирэхэд нь “чулуу шидээд” хөөнө гэцгээж байна.
