Америкийн ТНБД Жон Керригийн айлчлалаас үүдэн Н.Энхбаяр нар өлсгөлөнгөө зогсоолоо
Өлсөөд хэзээ ч үхэхгүй гэж яригддаг Н.Энхбаяр тэргүүтэй МАХН-ынхан өчигдөр оройны 22 цагийн үед өлсгөлөнгөө зогсоолоо. МАХН-ын дарга Н.Энхбаяр болон намын нэр бүхий 10 гаруй гишүүд өнгөрсөн бямба гарагаас эхлэн өлсгөлөн зарлаж эхэлсэн юм. Намын дарга нь өөрөө тэргүүлэн бүр эхнэрээ дагуулан тэмцлийн хатуу хэлбэрийг сонгосон шалтгаан нь намын дарга, дэд даргаас эхлүүлэн нэлээд олон хүнийг хууль хяналтын байгууллагаас УИХ-ын 2016 оны сонгуульд оролцуулахгүй хэмээн мэдэгдсэнээс болсон билээ. Харин тэд өлсгөлөнгөө зогсоосон нь зорилгодоо хүрсэн эсэх, эрх баригчид буулт хийж нэр дэвших эрхийг нь нээсэн эсэх нь тодорхойгүй байна. Гэхдээ энэ сарын 5-нд АНУ-ын Төрийн нарийн бичгийн дарга Жон Керри Монголд айлчлал хийх гэнэ. АСЕМ гэдэг их арга хэмжээг хийх гэж байгаа манай дарга нар бидний бүх зүйл хэвийн хэмээн том гүрний хоёрдугаар хүнд харуулахыг хүссэн байж болох талтай.
