Намын сунгааны үеэр нэр дэвшигч эр нүцгэлж “од” болжээ
Хоёр намын тогтолцоотой АНУ-д гуравдагч намууд нь сүүлийн үед идэвхижиж байгаа гэнэ. Энэ нь сонгуульд нэр дэвшигчдийг тодруулах намын дотоод сунгаа нь хоёр том намаас ч дутахгүй ширүүн бас элдэв адал явдлаар дүүрэн болдог болсоноос харагддаг. Америкийн Либертарианы\эрх чөлөөг эрхэмлэгч\ намын дотоод сунгааны үеэр нэгэн нэр дэвшигч телевизийн шууд ярилцлагын үеэр нүцгэлж шуугиан тарьжээ. Телевизийн хөтлөгч нэр дэвшигчдийг мөрийн хөтөлбөрийнхөө талаар танилцуулахыг хүсэхэд мань эр юу ч ярилгүйгээр шуудхан тайчих урлаг үзүүлсэн гэнэ. Намуухан хөгжмийн аяанд тэрээр эхлээд пиджак дараа нь зангиа цамц зэргээ нэг нэгээр нь аажуухан тайлж нэлээд өндөр хэмжээнд бэлтгэсэн нь илт болох тайчих урлаг үзүүлсэнд үзэгчид алга нижигнүүлэн ташжээ. Ийнхүү шууд нэвтрүүлгийн гол баатар болж улмаар олон нийтийн анхаарлын төвд шууд орж чадсан нэр дэвшигч эр сонгогчидын анхаарлыг өөртөө татах гэж ийм арга сэдсэн гэнэ.
