УИХ-ын гишүүд Токиогийн чуулганд оролцож байна
Улсын Их Хурлын дэд дарга Н.Энхболд тэргүүтэй Монголын парламентын төлөөлөгчид Японы Токио хотноо энэ сарын 8-12-ны өдрүүдэд болох Ази-Номхон далайн парламентын /АНДПЧ/ ээлжит 20 дугаар чуулганд оролцож байна. УИХ-ын Хууль зүйн байнгын хорооны дарга Д.Одбаяр, УИХ-ын гишүүн Р.Гончигдорж, Д.Энхбат, мөн УИХ дахь МАН, АН-ын бүлгийн ажлын албаны дарга Ш.Бадам, Б.Болдбаатар, УИХ-ын Тамгын газрын Хэвлэл мэдээлэл, олон нийттэй харилцах хэлтсийн дарга Ш.Содномжамц нар төлөөлөгчдийн бүрэлдэхүүнд багтсан аж.
Токиогийн энэ удаагийн чуулганаар АНДПЧ-ны уламжлалын дагуу Ази-Номхон далайн бүс нутгийн хамтын ажиллагааны асуудал болон бүс нутгийн улс төр, эдийн засаг, аюулгүй байдлын асуудалд анхаарлаа хандуулах юм. Мөн гамшгийн үеийн бэлэн байдал болон цөмийн эрчим хүчний аюулгүй байдлын асуудлаар бүс нутгийн хамтын ажиллагааны талаар хэлэлцүүлэг явуулахаар төлөвлөж байгаа бөгөөд үүний хүрээнд 2011 оны гуравдугаар сард Японы зүүн хэсэгт тохиолдсон хүчтэй газар хөдлөлтийн хор уршгийн тухай санал солилцох юм байна.
П.Мөрөн NUUTS.mn
