Суудал горилогч хоёроор нэмэгджээ
УИХ-ын Сонгуулийн тухай хуулийн “26.6-д Улс төрийн албан хаагчаас бусад төрийн албан хаагч, төрийн болон орон нутгийн өмчит, төрийн болон орон нутгийн өмчийн оролцоотой хуулийн этгээдийн удирдах албан тушаалтан УИХ-ын гишүүнд нэр дэвших бол сонгуулийн жилийн нэгдүгээр сарын 1-ний өдрөөс өмнө төрийн албанаас болон ажил, албан тушаалаасаа чөлөөлөгдсөн байна” гэж оруулсан билээ. Одоогоор уг хуулийн заалтын дагуу Авто замын газрын дарга Б.Цэнгэл, Ашигт малтмалын Хэрэг эрхлэх газрын дарга Ч.Батхуяг, Гаалийн ерөнхий газрын дэд дарга А.Мурат, Улсын бүртгэлийн ерөнхий газрын дарга Б.Мөнхбаатар, ГХЯ-ны төрийн нарийн бичгийн дарга Д.Цогтбаатар нар орсон байна. Тэдний оронд албан тушаалтан томилох хүртэл Засгийн газраас баталсан журмын дагуу түр орлон гүйцэтгэгчийг томилох аж.
Дээрх эрхмүүдээс гадна УИХ-ын Тамгын газрын Судалгааны төвийн судлаачид болох АН-ын гишүүн Н.Түвшинтөгс, ИЗН-ын гишүүн Ч.Базар нар албан тушаалаа хүлээлгэн өгчээ. Н.Түвшинтөгс нь 1996-2000 онд Ардчилсан холбоо эвсэл засгийн эрх барьж байхад УИХ-ын гишүүн байсан аж. Харин хатагтай Ч.Базар ИЗН-аас Хөвсгөл аймагт хэд хэдэн удаа нэр дэвшин сонгуульд өрсөлдөж байсан гэнэ.
Н.Намсрай NUUTS.mn
