Кадыровыг Путинд ховлосон иргэний байшинг шатаажээ
Нийтэлсэн: 2016-05-16 07:14:55
Чечений Кенхи тосгоны оршин суугч Рамазан Жалалдинов нь ОХУ-ын ерөнхийлөгч Путинд хандан Чечений ерөнхийлөгч Рамзан Кадыровын тухай гомдол гаргасан бичлэгээ Оросын цахим ертөнцөд тараасан. Гэтэл өнгөрсөн 13-ны шөнө хар баг зүүсэн хүмүүс ирж байшинг нь шатаан эхнэр хони хоёрыг нь хүлээд гүүрэн доор хаячихсан тухай Дагестаны “Черновик” сонинд мэдээлжээ. Азаар гомдол гаргагч тэр үед өөр тосгонд хувийн ажлаар явж байжээ. Мөн тосгоны оршин суугчдын байшинг нь шатаана хэмээн заналхийлж болсон явдлын талаар хэвлэлд мэдээлэл өгөхийг нь хоригложээ. Энэ сарын 12-нд Рамазан нь 10 минутын бичлэгдээ цэцэглэн хөгжиж байгаа гэдэг Чечень улсын тухай бодит үнэнийг өгүүлжээ. Улс даяар авилгал хээл хахууль цэцэглэж ард иргэд нь улам бүр ядуурч байгааг нотлон Кадыровыг Путинд дандаа худлаа хэлдэг гэж шүүмжилсэн. Мөн Москвагаас санхүүжүүлдэг тэтгэмжийн мөнгө хөдөөний иргэдэд очдоггүй тухай баримттай өгүүлсэн гэнэ.
