МАН-ын С.Бямбацогтын “Ньюпрогресс групп” дансаа хаалгаад баларчээ
УИХ дахь МАН-ын бүлгийн дарга С.Бямбацогтын “Ньюпрогресс групп”-тэй Хан-Уул дүүргийн татварынхан саяхан хэсэгтээ л “дайны” байдалтай байсан гэнэ. Татварынхан Ардын намын том даргын нэрийн хуудас нь болсон том компаниас нь 724 сая төгрөгийн татварын өрөө нэхээд шаардлага мэдэгдэл ар араас нь ирүүлсэн аж. Гайхалтай тэр өр нь өнгөрсөн жилийн 3-р улирлынх агаад одоо болтол төлөөгүй гүрийсээр татварыхны мэдэгдсэнчилэн “ихээхэн хүндрэл” учруулжээ. Хэдийгээр эдийн засгийн хямрал нөлөөлсөн байж болох нөлөө бүхий улстөрчийн компани гэдгээрээ татвараа он дамжуулан төлөхгүй удааж боломгүй л баймаар. Хан-Уулын татварынхан төрийн албадлага гэгчийг хэрэгжүүлж үл маргах журмаар гаргуулахаар банкин дахь дансыг хаахаар мэдэгдэл хүргүүлж бүр хаагаад сандаргасан гэнэ. Дээр нь шүүхэд хүртэл ханджээ. Дансаа хаалгах нь том компаниудын хувьд “онигоотой” л хэрэг гэгддэг. Гэхдээ эцэст нь хоёр тал эвлэрч эвлэрлийн гэрээ байгуулжээ. Гэрээ ёсоор Ардын намын том улстөрчийн компани нь татварын өрөө гаргаж өгсөн графикийн дагуу төлсөөр ирэх 6-р сарын 30-ны өмнө бүрэн барагдуулах бололтой. Энэ нь яг сонгуулийн өмнөх өдөр тул С.Бямбацогт нь татварын ямар нэгэн өргүй цаас шиг цагаан хүн болж сонгуульд оролцох гэнэ.
