“Путин-кафе”-ны 00-ын цаас нь Обамагийн зурагтай
Reuters агентлагийн сурвалжлагийн ачаар Оросын Красноярск хотын Путинг шүтэн бишрэгчдийн кафе дэлхий даяар алдаршжээ. Өнгөрсөн сард нээлтээ хийсэн гэх “Путин-кафе”-д орсон хүнд ямар сэтгэгдэл төрөхийг сэтгүүлчид гаргаж үзүүлэхийг зорьжээ. Кафены хана нь Путины хүүхэд ахуй цагаас эхлээд одоогийн хэмжээгүй эрхт төрийн тэргүүн байгаа үеийнх нь зураг зурагт хуудсаар битүү хучигджээ. “Та кафенд оронгуут үүднээсээ эхлээд л ширээ хүртэл ерөнхийлөгчийн хар цагаан, мэргэжлийн болон сонирхогчдын авсэн гэрэл зургуудад нүд тань эрээлжилнэ. Путины сурагч байх үеийн, хурим, КГБ-ын ажилтан байх үеийн болон жүдогийн цагаан өмсгөлтэй болон өдгөө сүр хүчээ харуулан шумбагч онгоц шалгаж байгаа зэрэг олон зургийг харж болно” хэмээн сэтгүүлч өгүүлжээ. Хэрвээ хүсвэл бүтэн биенийх нь хэмжээгээр хийлгэсэн барималтай нь зураг авахуулж болох гэнэ. Кафены эзэд дэлхийн бусад гүрний удирдагчдыг ч мартсангүй. Жорлонд нь орвол Обамагийн зурагтай 00-ын цаас өлгөөстэй аж. Европын холбооны билэг тэмдэгтэй амны цаасаар амаа арчаад хогийн саванд хаядаг гэнэ. Красноярск хот нь Москвагаас дөрвөн мянган км хол атал энд ч Путин шүтээн нь болж байгаа тухай сэтгүүлч гайхширчээ. Кафены эзний өгүүлснээр түүнийг орон нутгийн эрх баригчид ихэд сайшаасан гэнэ. Мөн эрүүл ахуйн зэрэг хяналт шалгалтын байгууллагууд ч нэг их “оролддоггүй” тухай сэтгүүлч сонсжээ. Энэ нь Путиныг тахин шүтэх үзлийг өнөөгийн эрх баригчид далдуур идэвхитэй дэвэргэж байгааг харуулж байна хэмээн дүгнэлт хийжээ.
